1 Crónicas 14 - Qheshwa Biblia DC

Hiranqa Davidman willajkunata kacharqa

¹ Tiro llajtaj reynin Hiranqa willajkunasninta Davidman kacharqa, jinataj wasi ruwajkunata, carpinterostapis. Paykunaqa cedro k'aspista aparqanku palaciota jatarichipunankupaj.

² Chaypacha Davidqa yacharqa Dios sut'inchasqanta Israelpa reynimpaj churasqanta, Israel ayllunta kamachishajtin allin risqanrayku.

Davidpa waj wawasnin kallarqankutaj

^3-7 Davidqa waj warmiswan casarallarqataj Jerusalempi. Kaypi aswanraj karqanku qhari wawasnin, jinataj warmi wawasnimpis. Jerusalempi nacekorqanku chay wawasnimpata sutisnin karqanku: Samua, Sobat, Natán, Salomón, Ibhar, Elisúa, Elpelet, Noga, Nefet, Jafía, Elisama, Eliada, Elifelet ima.

David atipan filisteosta

⁸ Filisteostaj yachaytawankama David ajllasqa kasqanta tukuynin Israelpa reynin kanampaj, paykunamanta tukuyninkutaj payta mask'aj rerqanku. Davidtaj chayta yachaspa paykunaj contrankupi llojserqa.

⁹ Chaypacha filisteosqa ñaupajman astawan rispa Refaim valleman junt'aykorqanku.

¹⁰ Chaypacha Davidqa Señorman tapurerqa: Atiymanchu filisteoswan maqanakoj riyta? Paykunata atipachiwankichu? Señortaj kuticherqa: Arí, paykunata makisniykiman jaywasqayki.

¹¹ Davidtaj Baal-perazinman rispa paykunata atiparqa, nerqataj: Uj mayu yaku chayamuy jinata Señorqa ñanta kicharin enemigosninkoj chaupimpi. Chayrayku Baal-perazinta suticharqanku.

¹² Chay jawa filisteospis lantisninkuta saqerpayarqanku, Davidtaj kamacherqa ruphaykuchinankuta.

¹³ Filisteos ujtawan maqanakoj jamullarqankutaj Refaim vallenejkama.

¹⁴ Jinamanta Davidqa watejmanta Diosta tapurillarqataj, Diostaj payman kuticherqa: Ama ñaupajmantachu maqajqa yaykuychej, manachayqa muyuykuspa bálsamo sach'as chayman chayaspa qhepa ladomanta maqaj yaykuychej.

¹⁵ Maypachachus sach'as patanejpi thaskishaspa ch'ajwajta uyarinki chaypacha maqanakoj churakuy; chay niyta munanqa noqa qampa ñaupaqeykita rishasqayta filisteo soldadosta wañurachinaypaj.

¹⁶ Davidtaj ruwarqa Dios imaynatachus nisqanman jina, filisteo soldadostataj atipaykorqanku, Gabaonmanta Gezerkama.

¹⁷ Chayrayku tukuynej jallp'aspi wapu kasqanqa uyarikorqa. Señortaj tukuy naciones manchachikunankuta ruwarqa.