1 Corintios 9 - Qheshwa Biblia DC

Apostolpata atikun llank'asqanmanta jap'inan

¹ Manachu libre kani? Manachu apóstol kani? Manachu Jesús Señorninchejta rikorqani? Manachu qankunapis Señorpi noqaj llank'asqay kankichej?

² Sichus wajkunapaj mana apostolchu kani chayqa, cheqamanta qankunapajqa apóstol kani; imaraykuchus Señorpa apostolnin kasqayqa qankunapi yachakun.

³ Ajinata kutichikuni, noqapaj rimajkunaman:

⁴ Manachu mikhuytapis ujyaytapis atiyku?

⁵ Ajinallataj, manachu noqapis atiyman creej warmita pusakuyta, imaynatachus waj apostolespis, Señorpa wauqesnin, Pedropis pusakunku ajinata?

⁶ Chayrí noqawan Bernabellawanchu, mana llank'anayoj kasqayku?

⁷ Pi soldadotaj karqa, qolqenta pagaspa kamachita ruwaj? Pitaj uva sach'ata plantaspa poqoyninmanta mana mikhunchu? Chayrí, pichus ovejasta michejqa, manachu ovejaj lechenta ujyanman?

⁸ Kaytaqa runa jinallachu nini? Manachu leypis kikillantataj nin?

⁹ Moisespa leynimpi escribisqa kashan: Ama churankichu ñukuta trillaj wakaman. Diosqa munanchu wakas allimpi kananta?

¹⁰ Chayta nispaqa noqanchejraykuchu nin? Arí, noqanchejrayku chay leyqa escribikorqa; chayrayku llank'ajqa suyaspa llank'an mana qhasipajchu; trillajpis trillan, poqoyninta oqhariyta suyaspa.

¹¹ Sichus noqayku, qankuna ukhupi tarporqayku Espirituman jina chayqa, kunanqa ashkhatachu qankuna ukhumanta cosechata oqharisqayku?

¹² Sichus qankuna ukhupi wajkuna jap'iyta atinku chayqa, noqaykurí manachu atiykuman llank'asqaykumanta jap'iyta? Chaywampis mana jinatachu ruwarqayku, astawanqa tukuy imata aguantakullarqayku, Cristoj evangeliompaj ama ima misk'anatapis churanaykupaj.

¹³ Manachu yachankichej templopi llank'ajkunaqa Diosman jaywasqasta mikhusqankuta? Jinallataj altarpi jaywajkunapis manachu altarpi kaj ofrendasmanta jap'illankutaj?

¹⁴ Ajinallatataj Señor kamacherqa evangeliota willajkunaman, evangeliomanta kausanankuta.

¹⁵ Noqarí, kay imasmanta mana imatapis jap'ikorqanichu. Kaytapis escribimuykichej, mana ajinata noqawan ruwanaykichejpajchu. Noqaqa wañuyta munayman manaraj pipis kay kusikuyniyta qhechushawajtin.

¹⁶ Evangeliota willani chayqa, mana imamanta jatunchakunay kanchu. Chaypaj kachasqa kani. Ay, noqamanta, manachus evangeliota willasaj chayqa!

¹⁷ Chayrayku tukuy sonqowan ruwasaj chayqa, t'inkayta jap'isaj; mana tukuy sonqowan ruwasaj chaypis, evangeliota willanaypaj kachasqapuni kani.

¹⁸ Mayqentaj noqaj t'inkayri? T'inkayqa kaymin: Kusikuywan qhasillata willasqay Cristoj evangelionta; evangeliopi llank'asqaymanta noqapaj kajta ama orqhonaypaj.

¹⁹ Chayrayku libre kashaspa kunanqa tukuypa kamachin kani, aswan ashkha runasta Cristoman pusanaypaj.

²⁰ Judiospajqa judíos jina kani, judiosta Cristoman pusanaypaj. Leypa kamachimpi kajkunapaj, manapis leypa kamachimpichu kani, leypa kamachimpipis kayman jina kani, leypa kamachimpi kajkunata Cristoman pusanaypaj.

²¹ Mana leyniyojkunapaj mana leyniyoj jina kani, Diospa leynimpi kashaspapis Cristoj leynillampitaj kani, Cristoman mana leyniyojkunata pusanaypaj.

²² Pisi kallpayojkunapajqa, pisi kallpayoj jina kani; Cristoman pusanaypaj pisi kallpayojkunata, sapa uj imachus kasqankuman jina tukuni, chay jinamanta wakillantapis salvanaypaj.

²³ Chay tukuyta ruwani evangeliorayku, chayllawampis yanapakoj kanaypaj.

²⁴ Manachu yachankichej pujllana kanchapi correjkunamanta? Cheqamanta tukuy correnku, chaywampis ujlla t'inkataqa jap'in atipasqanrayku. Qankunapis correychej t'inkata jap'inaykichejkama.

²⁵ Pillapis correspa atipanampaj wakichikun chayqa, cuerponta jark'an tukuy ima mana allin kajmanta; cheqamanta paykunaqa ismoj pilluta jap'inankupaj; noqanchejrí, mana ismoj pilluta jap'inanchejpaj.

²⁶ Chayrayku noqapis ajinata correni, mana qhasillapajchu. Ajinata maqanakuni mana wayrallata sajmaj jinachu.

²⁷ Astawampis cuerpoyta maqani, kasuchikunitaj, ama noqa wajkunaj yachachejnin kashaspa, noqa kikiy qhesachasqa kanaypaj.