1 Corintios 8 - Qheshwa Biblia DC

Lantikunaman jaywasqa mikhuykunas

¹ Lantikunaman mikhuna jaywasqasmanta tukuy yachanchej; chay yachaytaj qhasi mana kajta umata oqharichin; munakuyrí Espirituman jina wiñachin.

² Pillapis yuyanman imatapis yachasqanta chayqa, manaraj imatapis yachanchu, imaynatachus yachananta.

³ Sichus mayqempis Diosta munakunman chayqa, Diospis payta rejsin.

⁴ Chay mikhunata lantikunaman jaywasqamantaqa, yachanchej jina, lanteqa mana imachu kay pachapeqa. Yachallanchejtaj uj k'ata Dioslla kasqanta.

⁵ Kachunkupis dioskuna nisqa cielopi, chayrí jallp'a patapipis ashkha dioskuna, ashkha kamachejkunapis.

⁶ Noqanchejpajqa uj Dioslla, Tatanchej. Paymanta tukuy ima jamun, noqanchejtaj paypata kanchej; uj kamachejlla, chaytaj Jesucristo. Paynejtataj tukuy imas ruwasqas kanku. Noqanchejpis paynejta kanchej.

⁷ Manataj tukuychu yachanku kaykunasta; wakenqa kunankama yachasqas kanku lantikunaman jaywasqa mikhunaman, concienciankutaj pisi kallpayoj kaspa ch'ichichakun.

⁸ Chaywampis, mikhunaqa mana aswan allimpajchu Dioswan qhawachiwanchej; mana mikhuspaqa, mana pisichu kasunchej, nitaj mikhuspapis, astawanchu kasunchej.

⁹ Kunanqa allinta qhawarikuychej, libre kasqaykichejqa ama misk'ana jinachu kachun pisi feniyojkunapaj.

¹⁰ Pillapis qanta rikusunkiman mesapi mikhushajta, yachayniyoj kashaspa lantikunaj wasimpi chayqa, manachu chay pisi feniyoj qanta rikuspa mikhullanqataj lantikunaman jaywasqata?

¹¹ Qampa yachayniykirayku pisi feniyoj hermanoqa chinkaponqa, piraykuchus Cristo wañorqa.

¹² Ajinamanta ari, hermanospa contranta juchallispa, pisi feniyojpa sonqonta nanachispataj, Cristoj contrampi juchallinkichej.

¹³ Chayrayku lantiman jaywasqata mikhusqaychus hermanoyta misk'achinman chayqa, mana jayk'ajpis aychata mikhusajchu, hermanoyta ama misk'achinaypaj.