1 Corintios 15 - Qheshwa Biblia DC

Cristoj kausarimuynin

¹ Kunanqa, hermanos, yuyarichiykichej evangeliomanta willasqayta. Chaytataj qankunapis jap'erqankichej, chaypitaj qankuna sinch'ita sayashankichej.

² Chayrayku qankunachus chay willasqay palabrasta jap'ikunkichej chayqa, salvasqas kankichej. Mana jina chayqa, qhasillapaj creesqaykichejqa kanqa.

³ Ñaupajta yachacherqaykichej imaynatachus noqapis jap'isqayta; Cristo juchanchejrayku wañusqanta, Escriturasman jina.

⁴ P'ampasqa karqa, kausarimorqataj kinsa diamanta Escriturasman jina.

⁵ Rikhurerqataj Pedroman, chaymanta chunka iskayniyoj apostolesninman.

⁶ Chay qhepata hermanosman rikhurillarqataj phishqa pachaj kurajman tantasqa kashajtinku. Chaykunamanta ashkhasraj kausashanku, wakintaj wañurankuña.

⁷ Chaymanta rikhurerqa Santiagoman; chay qhepatataj tukuynin apostolesman.

⁸ Tukuypa qhepantataj, noqamampis rikhuriwarqa sullusqa wawaman jina.

⁹ Noqaqa aswan juch'uy kani apostolesmanta, manataj apóstol sutiyoj kanaypaj jinachu kani, Diospa iglesianta qhatiykachasqayrayku.

¹⁰ Chaywampis, Diospa khuyakuyninrayku imachus kani chay kani. Khuyakuynintaj noqapajqa mana qhasipajchu karqa. Chantá tukuyninkumanta astawan llank'arqani; mana noqallachu, astawanqa Diospa khuyakuynin noqapi kasqanrayku.

¹¹ Chayrayku noqapis kasaj, paykunapis kachunku. Ajinata evangeliota willararqayku, ajinallatataj qankunapis chayta uyarispa creerqankichej.

Wañusqas kausarimonqanku

¹² Wañusqakunamanta Cristo kausarimusqanta willakun chayqa, imaynatataj qankuna ukhumanta wakin ninku wañusqamanta kausarimoyqa mana kanchu, nispa?

¹³ Sichus wañuymanta kausarimuy mana kanchu chayqa, nillataj ari Cristopis kausarimorqachu.

¹⁴ Cristochus mana kausarimorqa chayqa, qhasi mana kaj willasqaykoqa, qhasi mana kajllataj qankunaj creesqaykichejpis.

¹⁵ Cheqamantachus wañusqaspis mana kausarimunkuchu chayqa, Diosmanta llulla testigos rikhuriyku; imaraykuchus jinapeqa Diospa contranta willarqayku, pay Cristota kausarichimusqanta, pitachus mana kausarichimorqachu.

¹⁶ Sichus wañusqas mana kausarimunkuchu chayqa, Cristopis manallataj kausarimorqachu.

¹⁷ Cristochus mana kausarimorqa chayqa, qhasi mana kajllataj feniykichejpis. Chaywampis, juchaykichejpiraj kashankichej.

¹⁸ Jina chayqa, Cristopi creespa wañojkunapis chinkasqas kanku.

¹⁹ Kunan kausayllapichus Cristopi suyashanchej chayqa, tukuy runasmanta aswan khuyay wajchas jina qhawasqas kanchej.

²⁰ Kunanqa yachanchej Cristo kausarimusqanta wañusqakunamanta ñaupaj poqoy jina.

²¹ Imaynatachus wañuy jamorqa uj runanejta, ajinallatataj wañusqakunamanta kausarimuypis jamorqa uj runanejta.

²² Imaynatachus Adannejta tukuy wañorqanku, ajinallatataj Cristonejta tukuy kausarimonqanku.

²³ Chayrayku sapa uj maychus kanampi, qhepampi qhepampi kausarenqa, ñaupajta Cristoraj ñaupaj poqoy jina; chaymantaña Cristojta kajkunaqa kausarenqanku jamuynimpi.

²⁴ Chaypaj qhepanta tukukuy jamonqa, maypachachus Cristo tukuy kamachiyta, tukuy atiyta, tukuy kallpata ima qhechojtin, chaypacha reinota Dios Tataman jaywaponqa.

²⁵ Cristoqa Reypuni kanan tiyan, tukuynin enemigosninta chakisnin uraman churanankama.

²⁶ Qhepa kaj enemigotaj phirisqa kanqa. Chaytaj wañuy.

²⁷ Diosqa, Cristoj chakisnin uraman tukuy imata churarqa; imaynatachus nerqa paypa chakisnin uraman tukuy imata churasqanta. Chakisnin uraman churajtaj Dios. Paytaj mana chakisnin urapichu.

²⁸ Chaymanta tukuy imas payta kasonqanku chayqa, kikin Churimpis Tatanka kasonqa, pichus payta tukuy imawan kasucherqa; ajinamanta Dios tukuy ima kanampaj, tukuypitaj.

²⁹ Mana jina kanman chayqa, imata ruwanqanku wañusqasrayku bautizakojkunari, wañusqas mana imaynamanta kausarimojtinkuri? Imaraykutaj wañusqas mana imaynamanta kausarimojtinkuri? Imaraykutaj wañusqasrayku bautizakunkuri?

³⁰ Chantá, imaraykutaj noqayku sapa kuti wañuy qayllapi kashayku?

³¹ Niykichej hermanos, sapa p'unchay wañuy patapi kasqayta, Señorninchej Jesucristopi qankunamanta kusikusqayrayku.

³² Runa jina tinkorqani phiña animaleswan Efesopi. Imata tarini chaywan? Cheqamanta wañusqaschus mana kausarimunku chayqa, mikhuna ari, ujyanataj, imaraykuchus q'aya wañupusunchej.

³³ Ama ch'aukiyachikuychejchu. Sajra parlajkunawan puriy allin yachasqa ruwaykunata chinkachin.

³⁴ Qankuna rijch'ariychej sumaj cheqan kausayman, amataj juchalliychejchu; imaraykuchus wakin qankunamanta Diosta mana rejsinkuchu. Kayta nini qankuna p'enqakunaykichejpaj.

Imaynata wañusqas kausarimonqanku?

³⁵ Chantá pipis tapukunman nispa: Imaynatataj wañusqas kausarimonqanku? Ima cuerpowantaj sayarimonqanku?

³⁶ Wampu, qhawariy, muju tarpusqaykeqa mana kikin mujuchu p'utumonqa, ñaupajtaqa wañonqaraj.

³⁷ Mujuta tarpuspaqa mana kikin plantatapachachu tarpunki, manachayqa mujuta; trigo kachun, chayrí waj mujupis kachun.

³⁸ Chaymantaj Dios qon imayna rijch'ayniyojchus kananta, munayninman jina. Sapa mujutataj imaynachus kasqanman tukuchin.

³⁹ Tukuy aychaqa mana uj rejllachu. Runaspa aychanqa waj laya. Uywaspa aychampis waj laya. Challwaspatapis waj laya, p'isqospatapis waj laya.

⁴⁰ Tiyallantaj janaj pachapi ashkha imas, jinallataj kay pachapipis imaymana rijch'ayniyoj.

⁴¹ Intej lliphipiynin uj jina, killaj lliphipiynimpis waj jina, qoyllurkunaj lliphipiynimpis waj jina. Chayrayku uj qoyllorqa waj qoyllurwan mana kikinchu kanku lliphipiypeqa.

⁴² Ajinallataj kanqa wañusqasmanta kausarimoyqa. Imatapis ismunampaj tarpunchej chayqa, mana ismuyniyoj kausarimonqa.

⁴³ Qhesachasqa tarpusqaqa, kausarimonqa may allimpi qhawasqa. Pisi kallpayoj tarpusqataj kausarimonqa may atiyniyoj.

⁴⁴ Aycha cuerpotachus tarpunchej chayqa, espirituman jina cuerpoyoj kausarimonqa. Tiyan aycha cuerpo, tiyallantaj espirituman jina cuerpopis.

⁴⁵ Jinallataj escribisqa kashan: Ñaupaj kaj runa Adanqa, kausaj almayoj ruwasqa karqa; qhepa kaj Adantaj kausachej espirituyoj ruwasqa karqa.

⁴⁶ Chaywampis, mana espirituman jina kajrajchu ñaupajta karqa, astawanqa aychaman jina kajraj karqa. Chaymantaraj espirituman jina kajqa karqa.

⁴⁷ Ñaupaj kaj runaqa jallp'amanta ruwasqa karqa, jallp'a runa; qhepan kaj runataj janaj pachamanta.

⁴⁸ Imaynachus jallp'a runa karqa, kikillantaj kashanku jallp'amanta kajkunapis. Imaynachus janaj pachamanta kajqa karqa, kikillantaj kanku janaj pachamanta kajkunapis.

⁴⁹ Imaynatachus rijch'akunchej jallp'amanta ruwasqa runaman, kikillantataj rijch'akusunchej janaj pacha runaman.

⁵⁰ Kayta niykichej, hermanos: Aychawan, yawarwan ima, mana atinkumanchu Diospa reinonta chayaqepaj jap'iyta, nitaj ima ismoj kajpis atinmanchu chayaqepaj jap'iyta mana ismoj kajta.

^51-52 Kunanqa uj pakasqa yachayta willaykichej: Mana tukuychu wañusunchej, astawanqa tukuy uj jinaman tukusunchej, ujllata, ñawi ch'ipiypi, pututoj qhapariynimpa tukukuynimpi, imaraykuchus pututoqa qhaparinan tiyan, wañusqastaj kausarimonqanku mana ismusqas, noqanchejtaj uj jinaman tukusunchej.

⁵³ Kay ismoj cuerpoqa mana ismojwan p'achallikunan tiyan. Kay wañoj cuerpotaj, p'achallikunan tiyan mana mayk'aj wañuywan.

⁵⁴ Maypachachus kay ismoj cuerpo p'achallikunman mana ismojwan, kay wañuytaj p'achallikunman mana jayk'aj wañojwan chayqa, chaypacha junt'akonqa escribisqaman jina: Wañuytaqa Cristoj atipaynin upiykun.

⁵⁵ Ya, wañuy, maypitaj kashan chay atipasqayki? Ya, wañuy, maypitaj kashan chay wach'isqayki?

⁵⁶ Wañuypa wach'inanqa jucha, juchaj atiynintaj ley.

⁵⁷ Kunanqa Diosman gracias qosqa kachun, atipayta qowasqanchejmanta, Señorninchej Jesucristonejta.

⁵⁸ Ajina ari, munasqa hermanosníy, sinch'ita sayaychej ama kuyurispa, wiñaspapuni Señorpa ruwaynimpi, yachaspa Señorpa sutimpi llank'asqaykichejqa, mana qhasipajchu kasqanta.