1 Corintios 14 - Qheshwa Biblia DC

Waj parlaykunapi parlanamanta

¹ Munakuyta mask'aychej; jinallatataj Espirituman jina yachaykunata jap'iyta munaychej; astawanqa Diospa palabranta sut'inchayta.

² Pichus mana rejsisqa parlaypi parlajqa, mana runamanchu parlan, Diosman parlan, nitaj pipis entiendenchu parlasqanta, Espirituman jina pakasqa yachaykunata parlajtimpis.

³ Diospa palabranta sut'inchajqa, runasman parlan cheqanta purinankupaj, k'amispa, sonqochaspataj.

⁴ Pichus mana rejsisqa parlaypi parlan chayqa, paypa allinnillampaj parlakun. Pichus Diospa palabranta sut'inchajrí, Espirituman jina iglesiata wiñachin.

⁵ Noqa munayman tukuyniykichej parlanaykichejta mana rejsisqa parlaykunapi, astawanqa munayman Diospa palabranta sut'inchanaykichejta; sut'inchajqa aswan kuraj waj parlaypi parlajmantaqa. Payllataj chay parlasqanta sut'inchanman chayllapuni iglesiaqa Espirituman jina wiñayta atinman.

⁶ Kunanqa hermanos, sichus noqa qankunaman jamuyman waj parlaypi parlaspa chayqa, manachu parlayman rikuchiywan, chayrí yachaywan, Diospa palabranta sut'inchaywan, chayrí yachachiykunawantaj? Ima allintaj kanman qankunapajri?

⁷ Ajinallataj kashan mana kausayniyoj tocanaswampis, sichus qena, guitarrapis, mana sapa ujnin waj jinata waqanman chayqa, imaynata yachasunman qenachus, chayrí guitarrachus waqasqantari?

⁸ Pututuchus mana allinta waqanman chayqa, pitaj wakichikunman guerraman rinampajri?

⁹ Ajinallataj qankunapis, waj parlaypi parlaspa mana sut'itachu entiendenankupaj jina ninkichej chayqa, imaynatataj yachakunman nisqaykichejri? Ajina chayqa qhasillata parlashankichej.

¹⁰ Kay pachapeqa may chhika parlaykuna tiyan, manataj ujpis kanchu ni imata ninayajqa.

¹¹ Chaywampis, noqachus mana entiendeyman, pichus waj parlaykunapi parlawasqanta chayqa, chay runapaj waj llajtayoj jina kani, paypis noqapaj waj llajtayoj jinallataj.

¹² Ajinallatataj qankunapis, Espíritoj yachaykunasninta munankichej chayqa, ashkha imasta ruwaychej, iglesiata ñaupajman pusanaykichejpaj.

¹³ Chayrayku mana rejsisqa parlaypi parlajqa, Diosmanta mañakuchun sut'inchayta atinampaj.

¹⁴ Sichus noqa Diosmanta mañakuyman, mana rejsisqa parlaypi chayqa, espiritullay mañakun, yuyayniytaj mana imata yachaspa qhepakun.

¹⁵ Imatataj ruwasaj? Espiritupi mañakusaj, jinallatataj yuyayniywampis; takisaj espiritupi, jinallataj yuyayniywampis takisaj.

¹⁶ Qanchus Diosta espiritullawan yupaychawaj chayqa, mana creejqa, imaynatataj “Amén” ninman, graciasta qoshajtiyki, mana yachaspa imatachus nisqaykita?

¹⁷ Cheqamanta qanqa allinta graciasta Diosman qonki; chay ujtajrí, mana ñaupajman rinchu.

¹⁸ Diosman graciasta qoni waj parlaykunapi parlasqaymanta, qankunamanta astawan.

¹⁹ Chayrayku noqaqa phishqa palabrasllata iglesiapi yuyaywan parlayman, wajkunaman yachachinaypaj; chunka waranqa palabrasta mana rejsisqa parlaykunapi parlanaymantaqa.

²⁰ Hermanos, yuyaypeqa ama wawas jina kaychejchu, astawanqa sajra yuyaypaj wawas jina kaychej. Machu runas jina allinta yuyaychej.

²¹ Escriturapi escribisqa kashan: Kay llajtata parlapayasaj waj parlaykunapi, karu llajtayojkunaj siminwan; ni ajinapipis uyarikonqankuchu, nin Señorqa.

²² Chayrayku waj parlaykunapi parlayqa, uj señal mana creejkunapaj churasqachu, manachayqa mana creejkunallapaj. Diospa palabranta sut'inchayrí churasqa creejkunapaj, manataj mana creejkunapajchu.

²³ Sichus iglesia uj cheqallapi tantasqa kashan chayqa, tukuyninkutaj parlarinkuman waj parlaykunapi; chaymantaj yaykumunkuman mana yachajkuna, chayrí mana creejkunapis, manachu nisunkichejman locos kasqaykichejta?

²⁴ Tukuyninkutaj sut'inchashankuman Diospa nisqanta, chaymantaj yaykunman Diospi mana creej runa, chayrí mana yachaj; tukuy payta Diosman kutirichenqanku, rikuchenqankutaj juchasapa kasqanta.

²⁵ Ajinapi sonqon ukhupi ima jucha kasqantapis yachakonqa, qonqorikuspataj Diosmanta mañakonqa, cheqamantapuni Dios qankuna ukhupi kashasqa, nispa.

Tukuy imata allinta ruwaychej maychus kajta

²⁶ Kunanqa, ima nisunmantaj, hermanos? Tantakojtiykichejqa, sapa ujniykichejpata tiyapusuchun salmo, uj yachachiy, Dios imatachus rikuchisqan, waj parlaykunapi parlay, parlaykunata sut'inchay. Chay tukuy ima ruwakuchun iglesia ñaupajman rinampaj.

²⁷ Mana rejsisqa parlaypi parlaspaqa, parlachunku iskay, chayrí, kinsa qhepampi qhepampi; ujtaj sut'inchachun chay parlasqankuta.

²⁸ Mana pipis parlasqankuta sut'inchaj kajtenqa, iglesiapi ch'inlla kakuchunku. Sapa ujninku sonqonkupi Dioswan parlachunku.

²⁹ Ajinallatataj sut'inchajkunapis parlachunku, iskay, chayrí kinsa, wakinkunataj imatachus nisqankuta reparachunku.

³⁰ Wajmantajchus chaypi tiyashajman, Dios imata rikuchinman parlanampaj chayqa, ñaupajta parlajqa ch'in kakuchun.

³¹ Tukuyniykichejtaj Diosmanta sut'inchayta atinkichej, parlayta ujmanta ujmanta, tukuy yachanankupaj, tukuytaj sonqochasqa kanankupaj.

³² Sut'inchajkunaj espiritunku, waj sut'inchajkunaj nisqankupi kashanku.

^33-34 Diosqa mana pejtuchej Dioschu, astawanqa sonqo tiyachej Dios. Imaynachus ajllasqaspa tukuy iglesiasninkupipis, warmisqa ch'in kakuchunku, imaraykuchus paykunaqa mana parlanankuchu; astawanqa kasukoj kananku tiyan, imaynatachus leypi nin.

³⁵ Imata yachayta munanku chayqa, wasipi tapukuchunku qosankuta; imaraykuchus mana allin qhawasqachu uj warmi iglesia ukhupi parlananqa.

³⁶ Chantá qankunamantachu llojserqa Diospa palabranqa, chayrí, qankunallamanchu chayamorqa?

³⁷ Mayqenchus yuyanman Diospa sut'inchajnin kasqanta, chayrí Espirituman jina kasqanta, allinta yachachun, kay escribimusqayqa Señorpa kamachisqasnin kasqanta.

³⁸ Pichus Señorpa kamachisqanta mana rejsejtaqa, Diospis mana payta rejsenqachu.

³⁹ Ajina hermanos, Diospa nisqanta sut'inchayta mask'aychej, amataj jark'aychejchu waj parlaykunapi parlajkunata.

⁴⁰ Chaywampis, tukuy imata allinta ruwaychej, maychus kajta.