1 Corintios 12 - Qheshwa Biblia DC

Santo Espíritu atiykunata qon

¹ Noqa munani hermanos, Espirituman jina kaj yachaykunata yachanaykichejta.

² Qankuna yachankichej, gentilesllaraj kashaspa, chay copa lantikunaman pusachikoj kankichej.

³ Chayrayku yachachiykichej, mana pipis niyta atinmanchu Diospa Espiritumpi kashaspaqa, Jesús maldicisqa kasqanta; nillataj pipis niyta atinmanchu Jesús Señor kasqanta, mana Santo Espiritupi kaspaqa.

⁴ Imaymana yachaykuna tiyan. Chaywampis Espiritoqa pay kikillampuni.

⁵ Evangeliopeqa imaymana llank'anas tiyan. Chaywampis, Señorqa kikillampuni.

⁶ Imaymana ruwanas tiyan. Dios tukuy imata ruwan tukuypi. Chayampis, Diosqa kikillampuni.

⁷ Santo Espíritu rikuchikun sapa ujman, allin kanampaj.

⁸ Wakinmanqa Espiritunejta yachay palabras qosqa, parlayta atinampaj; wakinmantaj kikin Espiritullataj qon yachaysapa yachaykunata.

⁹ Chay kikin Espiritullataj wakinman creeyta qon; wakinmantaj yachayta qon, onqosqasta thañichinampaj.

¹⁰ Ujmanqa qon milagrosta ruwanampaj; ujmantaj Diosmanta sut'inchanampaj; ujmantaj imayna espirituchus kasqanta rejsinampaj; ujmantaj imaymana parlaykunata parlanampaj; ujmantaj qon, waj parlaykunapi parlasqankuta sut'inchanampaj.

¹¹ Kay tukuy imasta ruwan ujlla, kikin Espíritu. Paytaj rak'in imaymana yachaykunata sapa ujman munasqanman jina.

Tukuy kanchej uj cuerpolla

¹² Uj cuerpojta ashkha imasnin tiyan. Chay imasninwantaj ujlla cuerpoqa, ajinallataj Cristopis ujlla.

¹³ Uj Espiritullapi tukuy bautizasqas karqanchejqa, uj cuerpolla kananchejpaj, judíos, griegos, wata kamachis, libre kajkuna ima. Tukuyninchejtaj uj Espiritullamanta ujyarqanchej.

¹⁴ Chaywampis, cuerpoqa mana uj imayojllachu, ashkha imasniyoj.

¹⁵ Chakichus ninman: Mana makichu kani, mana cuerpojtachu kani, nispa. Chayraykuchu mana cuerpojta kanman?

¹⁶ Ningritajchus nillanmantaj mana ñawichu kasqanta, chayraykuchu mana cuerpojta kanman?

¹⁷ Sichus tukuy cuerpo ñawi kanman chayqa, maypitaj ningri kanmanri? Chayrí, tukuytajchus ningri kanman chayqa, maypitaj senqa kanmanri?

¹⁸ Chayrayku cuerpoj imasninta Dios churarqa cuerpoman, sapa ujninta maypichus kananman, munasqanman jina.

¹⁹ Cuerpoj imasnenqa tukuyninchus uj imalla kanman chayqa, maypitaj cuerpo kanmanri?

²⁰ Kunanqa aycha cuerpo ashkha imasniyoj, chaywampis ujlla cuerpoqa.

²¹ Ñawipis mana niyta atinchu makitaqa: Mana munaykichu, nispa; nitaj imapis niyta atinmanchu chakistaqa: Mana munaykichejchu, nispa.

²² Astawanqa, cuerpoj imasnin aswan llauch'isman rijch'akojkunaraj, astawan necesitakunku.

²³ Cuerpoj wakin imasnin mana allimpaj qhawasqasta, astawanqa allimpaj qhawanchej; noqanchejpi mana allin rijch'akojkunatapis, aswan allinta p'achallichinchej.

²⁴ Noqanchejpi kaj allimpaj qhawasqa imasqa, mana imatapis necesitankuchu; astawanqa Dios cuerpotaqa sumajta wakicherqa, mana allimpaj qhawasqa kajkuna aswan respetasqa kanampaj.

²⁵ Ama cuerpopi tukuy imas t'aqanakunankupaj, astawanqa paykunapura qhawarinakunankupaj.

²⁶ Sichus uj ima nanasqa chayqa, tukuyninku nanachikunku paywan khuska. Sitajchus ujnin kaj ima allimpaj qhawasqa chayqa, tukuyninku paywan kusikunku.

²⁷ Qankunaqa Cristoj cuerpon kankichej; sapa ujtaj chay cuerpoj imasnin kankichej.

²⁸ Ajinata Dios churan iglesiapi sapa ujta: Ñaupajta apostolesta, qhepanta profetasta, chaymanta yachachejkunata, chaymantataj milagrosta ruwajkunata, thañichejkunata, yanapajkunata, kamachejkunata, waj parlaypi parlajkunata ima.

²⁹ Tukuychu apóstoles kanku? Tukuychu profetas kanku? Tukuychu yachachejkuna, chantá milagrosta ruwajkunapis kanku?

³⁰ Tukuyninkuchu thañichiyta yachanku? Tukuyninkuchu waj parlaykunata parlanku? Tukuyninkuchu sut'inchanku?

³¹ Chaywampis qankunaqa, aswan sumaj yachaykunata jap'iyta munaychej; astawanqa noqa qankunaman rikuchiykichej aswan sumaj ñanta.