1 Corintios 11 - Qheshwa Biblia DC

Warmis templopi

¹ Qhatiwaychej noqata, imaynatachus noqapis Cristota qhatini ajinata.

² Mayta kusikuni, hermanos, tukuy imapi noqamanta yuyarikusqaykichejmanta, ruwasqaykichejmantapis yachachisqayman jina.

³ Munani yachanaykichejta Cristoqa tukuy qharispa uman kasqanta, qharitaj warmej uman, Diostaj Cristoj uman.

⁴ Pi qharichus mana sombreronta lluch'ukuspa Diosmanta mañakunman, chayrí Diospa palabranta sut'inchanman chayqa, uj p'enqay kanqa umampaj.

⁵ Pi warmillapis mana uman suk'umpasqa Diosmanta mañakunman, chayrí Diospa palabranta sut'inchanman chayqa, uj p'enqay kanqa umampaj; chujchantapis k'utuchikunman karqa jina.

⁶ Warmichus umanta mana suk'umpanman chayqa, allin kanman chujchanta k'utuchikunan. Sichus warmipaj p'enqay kanman chujchanta k'utuchikunan, chayrí t'ojluchikunampis chayqa, suk'umpakuchun.

⁷ Qhareqa sombreronta ama churakuchunchu. Qhareqa Diospa rijch'aynin, kusikuynintaj kasqanrayku. Warmitaj qharej kusikuynin.

⁸ Qhareqa mana warmimantachu ruwasqa karqa, astawanqa warmi qharimanta ruwasqa karqa.

⁹ Nillataj qhareqa warmiraykuchu ruwasqa karqa, astawanqa warmi qharirayku ruwasqa karqa.

¹⁰ Chayrayku, warmeqa umanta qhatakunan tiyan, angelespaj allin qhawasqa kananrayku.

¹¹ Señorpa ñaupaqempi kay pachapi, qharipis warmipis purajmanta yanapanakuspa kananku tiyan.

¹² Imaynachus warmi qharimanta ruwasqa karqa, ajinallataj qhareqa warmimanta nacikun. Chaywampis, tukuy ima jamun Diosmanta.

¹³ Qankuna kikiykichej qhawaychej. Allinchu kanman warmi Diosmanta mañakunan umanta mana suk'umpakuspa?

¹⁴ Kikin kausayninchej yachachiwanchej qharipajqa uj p'enqay kasqanta chujchanta wiñachikunanqa.

¹⁵ Warmipajqa allin chujchasninta wiñachinan, imaraykuchus payman chujchasqa velo jina qosqa karqa.

¹⁶ Chaywampis, pipis churanakuyta munanman chayqa, noqanchejqa mana yachanchejchu churanakuyta, nitaj Diospa iglesiasnimpis.

Señorpa Cenampi mana allinta ruwajkuna

¹⁷ Kayta qankunaman willamuspaqa, mana alabaykichejchu, imaraykuchus mana allimpajchu tantakunkichej, astawanqa mana allimpaj.

¹⁸ Kunanqa, iglesia jina tantakojtiykichej uyarini qankuna ukhupi t'aqanakus kasqanta; uj chhikamanta yuyani ajinapuni kasqanta.

¹⁹ Cheqamanta, kanampuni tiyan t'aqanakus qankuna ukhupi, yachakunampaj mayqenkunachus cheqan sonqoyoj kasqaykichejta.

²⁰ Ajinata qankunapura tantakuspa mikhunkichej chayqa, manaña Señorpa Cenantachu mikhunkichej.

²¹ Tukuy ujllapi mikhuna kashajtin, sapa uj ñaupajta cenanta mikhun, ujtaj yarqhachikun, ujtajrí machaykun.

²² Imataj chayri? Manachu wasiykichej tiyarqa mikhunaykichejpaj, ujyanaykichejpajpis? Mana imayojkunata p'enqachispa, chayrí Diospa iglesiantachu qhesachankichej? Imatataj nisqaykichej, allinta ruwankichej nisqaykichejchu? Chaymantaqa mana alabaykichejchu.

Señorpa Cenan

²³ Imatachus Señormanta yacharqani, chayllatataj yachachiykichej: Maypachachus Señor Jesús jap'ichisqa karqa; chay kikin tutallataj t'antata oqharerqa.

²⁴ Graciasta qospataj chay t'antata parterqa, nispa: Kayta mikhuychej; kaymin cuerpoyqa, qankunarayku qosqa kanqa, kaytataj ruwaychej noqamanta yuyarikuspa.

²⁵ Ajinallatataj cenaytawankama, copata jap'ispa nerqa: Kay copaqa mosoj tratomin, yawarniypi ruwasqa; sapa kuti ujyaspa, Señormanta yuyarikuspa ruwankichej.

²⁶ Ajina ari, sapa kuti kay t'antamanta mikhuspa kay copamanta ujyaspataj Señorpa wañuyninmanta willankichej, pay kutimunankama.

Imaynatachus Señorpa Cenanta mikhunamanta

²⁷ Ajinallatataj pillapis mana allinta unanchaspalla, kay t'antamanta mikhunman, copamantapis ujyanman chayqa, Señorpa cuerponmanta yawarninmantawan juchachasqa kanqa.

²⁸ Chayrayku, sapa ujniykichej sonqoykichejta allinta qhawarikuychej, manaraj t'antata mikhushaspa, nitaj copamanta ujyashaspa.

²⁹ Pichus mikhun, ujyantaj mana Señorpa cuerponmanta unanchaspa chayqa, juchachasqa kanampaj mikhun.

³⁰ Chayrayku, qankuna ukhumanta ashkhas onqosqas kashanku, pisi kallpastaj, ashkhastaj wañunkuña.

³¹ Noqanchejchus allinta qhawarikusunman sonqonchejta chayqa, mana juchachasqaschu kasunman.

³² Juchachasqas kanchej chayqa, Señor jasut'iwanchej, ama mundowan khuska wañuyman rinanchejpaj.

³³ Chayrayku, hermanosníy, mikhunapaj tantakuspaqa, suyarinakuychej ujkuna ujkunata khuska mikhunaykichejpaj.

³⁴ Mayqempis yarqhachikuspaqa, wasimpi mikhuchun, ajinamanta tantakuspa, ama juchachasqas kanaykichejpaj. Waj imastaqa noqa jamuspa cheqanman churasaj.