1 Corintios 10 - Qheshwa Biblia DC

Lantikunata mana yupaychanachu

¹ Hermanos, noqa munani qankuna yuyarikunaykichejta ñaupa tatasninchej phuyu urapi tukuy kasqankumanta, tukuytajmanta puka mar qochata pasasqankumanta.

² Ajinamanta, tukuyninku Moiseswan khuskachasqas bautizachikuspa karqanku phuyupi, mar qochapi ima.

³ Jinallataj tukuyninku mikhorqanku Espirituman jina uj kikin mikhuyllata.

⁴ Tukuyninkutaj ujyarqanku kikin ujyanallatataj Espirituman jina qaqamanta llojsimoj yakutaqa. Espirituman jina qaqarí, paykunawan khuska purej, chay qaqataj Cristo karqa.

⁵ Chaywampis, paykunamanta ashkhas Diosta mana kasorqankuchu; chayrayku chay ch'impi wañurarqanku.

⁶ Chay tukuy imas karqa noqanchej yachakunanchejpaj, ama noqanchej sajra imasta munapayananchejpaj paykuna jina.

⁷ Chayrayku qankunaqa ama lantikunata yupaychaychejchu, imaynatachus paykunamanta wakin yupaycharqanku jinataqa. Escribisqapi nishan: Chay runasqa tiyaykukorqanku mikhunankupaj, ujyanankupaj. Chaymantataj sayarerqanku pujllanankupaj.

⁸ Ama noqanchejqa, paykunamanta wakinkuna jinachu qhenchachakusunchej. Paykunaqa chay uj p'unchayllapi wañurarqanku iskay chunka kinsayoj waranqa.

⁹ Amataj Señorta phiñachinachu, imaynatachus paykunamanta wakinkuna phiñacherqanku ajinata. Chayrayku wañorqanku katarispa wach'isqawan.

¹⁰ Amataj thutuychejchu Diospa contranta, imaynatachus paykunamanta wakinkuna thutorqanku jinataqa. Señorpa angelnintaj paykunata wañuracherqa.

¹¹ Kay tukuy imas qhatirerqa ñaupa tatasninchejta, escribisqapitaj churasqa kashan noqanchej yachananchejpaj, kay qhepa p'unchaykuna kausajkuna.

¹² Ajinaqa, pichus sinch'i sayasqanta yuyakojqa, allinta qhawakuchun ama urmanampaj.

¹³ Qankunaqa kallpaykichejman jinalla tentaciontaqa aguantankichej. Diosqa cheqamin, manataj saqesonqachejchu tentasqa kanaykichejta, mana atipay atina tentacionwanqa. Astawanqa tentación jamojtin, Diosllataj yanapasonqachej imaynatachus chay tentacionmanta llojsinaykichejta, ajinapi atipayta atinaykichejpaj.

¹⁴ Chayrayku munakusqasníy, ayqekuychej lantikunata yupaychanamanta.

¹⁵ Parlaykichej yuyayniyoj runasman jina. Qankuna kikiykichej kay nisqayta unanchaychej.

¹⁶ Bendición copata bendicisqanchejqa, manachu ujlla kasqanchejta niyta munan Cristoj yawarnimpi? T'anta p'akisqanchejtaj, manachu niyta munan ujlla kasqanchejta Cristoj cuerpompi?

¹⁷ Ujlla t'anta kajtin, noqanchejtaj ashkhas kaspa uj cuerpolla kanchej, imaraykuchus tukuyninchej uj t'antallamanta mikhunchej.

¹⁸ Qhawariychej Israel aylluta aychaman jina kausasqanta: Uywa wañuchisqasmanta mikhojkunaqa, manachu altarmanta jap'ishanku?

¹⁹ Imatataj niniri? Lanteqa ima kasqantachu nini, chayrí lantikunaman chay aycha jaywasqastachu ima kasqanta nini?

²⁰ Noqa nini, gentilesqa uywa wañuchisqasta supaykunaman jaywanku, manataj Diosmanchu. Noqaqa mana munanichu supaykunawan kanaykichejta.

²¹ Mana atiwajchejchu Señorpa copanmanta ujyayta, supaypa copanmantapis. Manataj atiwajchejchu Señorpa mesanmanta mikhuyta, supaykunaj mesanmantapis.

²² Chayri munanchejchu Señorta phiñachiyta? Chayrí astawan atiyniyojchu kanchej paymanta?

Cristota qhatikojkunaj munakuynin

²³ Tukuy ima allin noqapajqa, manataj tukuyninchu walej. Tukuy ima allin, manataj tukuyninchu Espirituman jina wiñachin.

²⁴ Ama pipis mask'achunchu paypaj allinnillanta, astawanqa wajpaj allinnintapis mask'achun.

²⁵ Aycha qhatupi tukuy ima qhatukojmanta mikhuychej, concienciarayku ama ni imata tapuspa.

²⁶ Jallp'aqa Señorpata, jinallataj tukuy ima jallp'a patapi kajpis.

²⁷ Pipis Señorpi mana creej wajyasunkichejman mikhunaykichejpaj, qankunataj riyta munankichej chayqa, mikhuychej tukuy ima qosqanta ama imata tapuspa concienciarayku.

²⁸ Sichus pipis chaypi willasunkichejman: Kay aychaqa lantikunaman jaywasqa karqa nispa chayqa, ama mikhuychejchu chay willasqanrayku, chantá concienciaraykutaj; [imaraykuchus Señorpata jallp'aqa, tukuy ima junt'a kasqanwan].

²⁹ Parlashani wajpa conciencianmanta, mana qampamantachu. Chaywampis, imaraykutaj libre kasqay juzgasqa kanman wajpa conciencianraykuri?

³⁰ Diosman graciasta qospachus mikhorqani chayqa, imaraykutaj sajrapaj qhawawanku graciasta qosqaymantari?

³¹ Kunanqa mikhuspapis, ujyaspapis, imata ruwaspapis tukuy imata ruwaychej Diospa kusikuynimpaj.

³² Ama misk'achiychejchu judiosta, nitaj gentilesta, nillataj Diospa iglesiantapis.

³³ Noqapis allin rijch'ayta munani tukuy imapi. Manataj noqaj allinnillaytachu mask'ashani, astawanqa wajkunaj allinnintapis mask'ashallanitaj, salvasqas kanankupaj.