1 Corintios 1 - Qheshwa Biblia DC

Pablo cartata apachin Corintopi kaj iglesiaman

¹ Noqa, Pablo, wajyasqa kani Diospa munayninrayku, Jesucristoj apostolnin kanaypaj, hermano Sosteneswan ima.

² Escribimuni kay cartata, Diospa iglesianman Corinto llajtapi kajman. Paykunaqa llimphuchasqas kanku Cristo Jesuspi, wajyasqas, juchamanta t'aqasqas kausanankupaj; mayllapipis Señorninchej Jesucristoj sutinta tukuy wajyakojkunawan ima. Payqa paykunaj Señorninku noqanchejpatapis.

³ Qankunapaj kachun khuyakuy, sonqo tiyakuy Dios Tatanchejmanta Señor Jesucristomantawan.

Diospa khuyakuynin Cristonejta

⁴ Graciasta qonipuni Diosniyman qankunamanta; Dios khuyakuyninta qosusqaykichejmanta Cristo Jesusnejta.

⁵ Tukuy imapi qhapajyachisqas kankichej Cristorayku, tukuy parlaypi, tukuy yachaypi ima.

⁶ Ajinata ari, Cristomanta tukuy allin kaj willasqa karqa. Chaytaj qankunapi junt'akun.

⁷ Chay jinamanta, ama imapis Diospa qosqanmanta qankunapi pisichunchu, Señorninchej Jesucristoj rikhurimunanta suyasqaykichejpi.

⁸ Paytaj sinch'ita sayachisonqachej tukukuykama, ama pipis k'amisunaykichejpaj, Señorninchej Jesucristoj p'unchaynimpi.

⁹ Diosqa junt'ampuni nisqanta, payraykutaj wajyasqas karqankichej, Churin Jesucristo Señorninchejwan khuska kanaykichejpaj.

Iglesiapi t'aqanaku

¹⁰ Hermanos, mañakuykichej Señorninchej Jesucristoj sutimpi, tukuyniykichej uj kajllata parlanaykichejta; amataj qankuna ukhupi t'aqanaku kachunchu, astawanqa allin ujchasqapuni kaychej, uj sonqolla, uj yuyayllataj.

¹¹ Hermanosníy, Cloejpa kajkunamanta willawarqanku, qankuna ukhupi churanakuykuna kasqanta.

¹² Yachani sapa uj qankunamanta nisqaykichejta: Noqa Pablojta kani; noqa Apolospata kani; noqa Cefaspata kani; noqataj Cristojta kani, nispa.

¹³ Cristoqa t'aqasqachu kashan? Pablochu qankunarayku chakatasqa wañorqa, chayrí Pabloj sutimpichu bautizasqas karqankichej?

^14-15 Graciasta Diosman qoni, qankunamanta mana ujtapis bautizasqaymanta. Crispota Gayollatawan bautizarqani, ama pipis ninampaj sutiypi bautizasqa kasqaykichejta.

¹⁶ Estefanaspa familianta bautizallarqanitaj; chaymantaqa mana yuyanichu wajta bautizasqayta.

¹⁷ Cristoqa mana bautizajtachu kachamuwarqa, astawanqa evangeliota willanaypaj; manataj yachaysapa palabraswanchu, amataj Cristoj cruzpi wañuynin, qhasi mana kaj ruwasqa kanampaj.

Cristoqa Diospa atiynin yachaynintaj

¹⁸ Cristoj cruzninmanta parlayqa, uj locoyasqa runaj parlasqanwan ninakun; noqanchej salvasqa kajkunapajtaj Diospa atiynin.

¹⁹ Escribisqamin kashan: Chinkachisaj yachayniyojkunaj yachayninkuta, qhesachasajtaj yuyayniyojkunaj yuyayninkuta.

²⁰ Maypitaj kashan chay yachayniyoj? Maypitaj chay yachachejri? Maypitaj kay mundoj yachaykunasninmanta churanakoj? Manachu Diosqa kay mundoj yachaynintaqa locoyacherqa?

²¹ Diospa yachayninman jina, kay mundoqa Diosta mana rejserqachu, runaj yachayninrayku. Chayrayku Diosmanqa allin rijch'arqa, paypi creejkunata salvayta chay locoyasqa yachachiynejta.

²² Judiosqa mañanku señalesta, griegostaj mask'anku astawan yachayta.

²³ Noqaykutaj willayku Cristo chakatasqa kasqanmanta. Judiospajtaj kay willaykunaqa uj misk'ay jina, gentilespajtaj locoyasqa yachachiykuna jina karqa.

²⁴ Diospa wajyasqasnimpajtaj, judiospis, griegospis kachun, Cristoqa Diospa atiynin, yachaynintaj.

²⁵ Diospa yachaynenqa mana yuyayniyojman rijch'akun; chaytaj astawan yachayniyoj runakunaj yachayninmantaqa. Diospa pisi kallpanman rijch'akojpis, astawan kallpayoj runamantaqa.

²⁶ Chayrayku, hermanos, qhawarikuychej wajyasqas kasqaykichejta. Aychaman jina mana ashkhachu kankichej yachayniyojkunaqa, manataj ashkhachu atiyniyojkuna, manallataj ashkhachu qhapajkunapis.

^27-29 Diostaj ajllarqa kay pachapi wampu kajta, yachayniyojkunata p'enqachinampaj; kay pachapi pisi kallpayojtataj Diosqa ajllarqa, sinch'i kallpayojkunata p'enqachinampaj; kay pachamanta mana walej kajta, qhesachasqata, mana kasqanta ajllarqa, kajtapis chinkachinampaj, ama pipis Diospa ñaupaqempi, may wapu runaykachanampaj.

^30-31 Qankunaqa Diosrayku Cristo Jesuspi kashankichej; Cristotaj noqanchejpajqa yachay, cheqan kay, t'aqasqa kay, kacharichisqataj kay; imaraykuchus escribisqapi kasqanman jina: Jatunchakuyta munajqa, Señorpi jatunchakuchun.