ZACARÍAS 5 - Dios Rimashca Shimicunami

Quillcashca libro callpacujta muscuipi shina ricushcamanta

¹ Cutinllatajmi ñahuitaca huichilla alzarcani. Chaimantaca pillushca cara callpacujtami ricurcani.

² Chai angelca ñucataca: “¿Imatataj ricungui?” nishpami tapurca. Shina nijpimi ñucaca: “Pillushca cara callpacujtami ricuni. Chaica sunimanca iscun metrotami medin. Anchomanca chuscu metro chaupihuanmi medin” nircanimi.

³ Shina nijpimi, chai angelca cashna nirca: “Chaipica tucui cai pachapi causajcunapaj llaquitami quillcashca tiyacun. Ñaupaj ladoman nishca shinaca, shuhuajcunataca chingachishcami cangacuna. Huasha ladoman nishca shinaca mana llullanchijchu nishpa umajcunatapish chingachishcami cangacuna.

⁴ Tucuita Mandaj Diosca cashnami nin: Chai jatun llaquicunataca ñucami cacharcani. Chai jatun llaquica shuhuacunapaj huasimanpish, ñuca shutipi yangamanta llullajcunapaj huasimanpishmi chayanga. Paicunapaj huasicunataca caspicunatapish, rumicunatapish tucuimi p'aquishpa ñutungacuna ninmi” nircami.

Medina efa ucupi shuj huarmita ricushcamanta

⁵ Ñucahuan parlanacucuj ángel ricurishpaca: “Cambaj ñahuita huichilla alzashpa, chaipi ima tiyacujta ricui” nircami.

⁶ Chaita ricushpami ñucaca: “¿Chaica imatagari?” nishpa tapujpi, chai angelca: “Chaica medina efami. Tucui cai pachapi causajcunapaj juchacunaca cai efa ucupimi” nircami.

⁷ Chaimantaca ñapish, chaita tapashca plomo tapata pascajpica, shuj huarmimi chai ucupica tiyacushca carca.

⁸ Chaimantaca chai angelca ñucamanca: “Cai efa ucupi tiyacuj huarmica juchatami ricuchin” nircami. Chashna nishpaca chai huarmitaca, efa ucullapitajmi plomo tapahuan tapachishpa churarca.

⁹ Cutin huichilla ricujpica, ishqui huarmicunami ricurirca. Chai huarmicunaca cigüeñapaj alascunatajllatami charirca. Paicunaca chai alascunapimi huairata apamurcacuna. Chai alasyuj huarmicunaca efata apashpami, jahua huairata callparcacuna.

¹⁰ Chaita ricushpami, ñucahuan rimanacucuj angeltaca: “¿Maicamataj chai efataca apashpa rincuna?” nishpa tapurcani.

¹¹ Chashna nijpimi, chai angelca: “Chaitaca Sinar llajtapi huasita rurashpa, chai huasi ucupica efata tiyachina jahuapi churangapajmi apashpa rincuna” nishpami cutichirca.