ZACARÍAS 2 - Dios Rimashca Shimicunami

Medina cordelta muscuipi shina ricushcamanta

¹ Chai q'uipami, ñahuita huichilla alzarcani. Chaipica medina cordelta maquipi aisashpa shayacuj shuj runatami ricurcani.

² Chai runataca: “¿Maimantaj ricungui?” nishpami tapurcani. Chashna nijpimi paica: “Ñucaca, Jerusalén pueblotami mashna ancho cashcata, mashna largo cashcata medinaman ricuni” nirca.

³ Chaimantaca ñapish ñucahuan parlanacuj ángel llujshijpica, shujtaj angelmi paita tupanaman llujshirca.

⁴ Chai tupanaman llujshij angelca, chaishuj angeltaca cashnami nirca: “Callpashpa chai mosoman cashna nigri: Jerusalén pueblopica achca runacunapish, achca animalcunapishmi jundaringa. Jerusalenca, pircacuna illajllami canga.

⁵ Jerusalentaca, ñucami lunyacuj ninahuan muyundijta pircashca shina jarcasha. Ñucaca jatun cashcata ricuchingapajmi, paicunapaj chaupipica cashna ninmi nigri” nishpami huillarca.

Diosca paipaj agllashcacunataca tigramuichij nishcamanta

⁶ Mandaj Diosca cashnami nin: “Riquichij, ñucami caipi chaipi causagrichun cacharcani. Cunanca janaj lado llajtapi causajcuna miticuichigari” ninmi Mandaj Diosca.

⁷ “Babilonia llajtapi causaj Sionlla, miticuyari” ninmi.

⁸ Tucuita Mandaj Diosca cashnami nin: “Ñucataca jatunyachishca q'uipami, cancuna imalla charishcacunata quichujcunapaj llajtacunamanca cachanga. Maijanpish cancunata llaquichishpaca, paipaj ñahuita ricucujta tujsicuj shinami llaquichicun.

⁹ Chaimantami ñuca maquita alzashpa, paicunataca llaquichigrini. Paicuna imalla charishcacunatapish, servijcunallatajmi tucuita quichushpa apangacuna. Chashna rurajpimari ñucataca, tucuita Mandaj Dios cachashcata yachanguichij” ninmi.

¹⁰ Mandaj Diosca cashnami nin: “Siónpi causajcunalla, cushicushpa cantaichigari. Ñucaca, ñallami cancunapajman shamugrini. Ñuca shamushpaca, cancunahuanmi causasha.

¹¹ Chai punllapica, Mandaj Dios ñucapajmanca, achca llajtacunamantami tandanacumungacuna. Chaimantaca ñucapajllami tucungacuna, ñucapish paicunahuanmi causasha” ninmi. Chashna rurashcata ricushpami, tucuita Mandaj Diosllataj ñucata cancunapajman cachashcataca yachanguichij.

¹² Mandaj Diosca, jucha illaj llajtapimi, pai japina cashca Judá llajtataca japinga. Jerusalén pueblotapish agllangami.

¹³ Tucui cai pachapi causajcuna, Mandaj Diospaj ñaupajpica, upalla caichigari. Paipajlla caj jucha illaj causanamantami paica jatarishca.