Tito 3 - Dios Rimashca Shimicunami

Mana c'uyaipajta c'uyashpa justificashcami

¹ Llajtata mandajcunata, pueblopi mandajcunatapish cazujcuna cachun, tucui ima allita ruranapajpish chaparacujcuna cachun yuyachingui.

² Pitapish ama mana alli nishpa rimaj, p'iñanacuicunata mana munaj, ashtahuanpish c'uyanacujcuna, tucuicunahuan alli shungu cashcata ricuchichun yuyachi.

³ Ñucanchijpish ñaupaca yuyai illajcuna, mana cazujcuna, chingarishcacuna, aichata cushichingapaj tucui shina ruranacunapi huatashcacunami carcanchij. Millai shungucuna, shujtajpaj charishcata munajcuna, shujtajcuna p'iñashcacuna, caishujmanta chaishujmanta p'iñanacujcunami carcanchij.

⁴ Chashna cajpipish ñucanchijta Quishpichij Diosca, alli cashcata, c'uyaj cashcata tucuicunaman ricuchishpami,

⁵ ñucanchijtaca quishpichirca. Mana ñucanchij ima allicunata rurashcamantachu quishpichirca. Ashtahuanpish ñucanchijta pai llaquishcamantami, paipaj Jucha illaj Espirituhuan maillashpa cutin huacharishcata rurashpa mushujyachirca.

⁶ Chashnami ñucanchijta Quishpichij Jesucristomantaca, Diosca paipaj Espirituta ñucanchijmanca yallijta curca.

⁷ Chashnami Diosca mana c'uyaipaj cajpipish c'uyashpa, justificashpa chasquirca. Chaimantami ñucanchij japina cashca huiñai causaitaca, chai yuyailla shuyacunchij.

⁸ Cai shimicunaca chashnatajmi. Chaimanta Diosta crijcunamanca paicunapaj imatapish allicunata rurana yuyailla cachun, ama manchashpa huillachunmi munani. Tucui caicunaca tucui gentecunapaj valijmi, allimi.

⁹ Ashtahuanpish yanga rimanacuicunata, ñaupa yayacunamanta yanga parlocunata, p'iñanacuicunata, Mandashcapi nishcacunamanta rimanacuicunatapish ama uyangui. Chaicunaca yanga, imapajpish mana allichu.

¹⁰ Tandanacushca crijcunata maijanpish chaupijpica, shuj cutin mana cashpaca ishqui cutin cunajpi mana cazujpica, paitaca llujshichishpa cachangui.

¹¹ Chashna rurashpa juchallijca jatun llaquiman rina cashcata paillataj ricuchicushcatami yachana cangui.

Imalla rurana cashcata yachachishcami

¹² Artemasta, mana cashpaca Tiquicota cambajman cachajpica, ima shinapish utca Nicopolispi ñucata ricuj shamupangui. Ñucaca tamya punllacunataca chaipi canatami yuyarircani.

¹³ Mandajcunahuan ñucanchijmanta rimaj Zenasman, Apolosmanpish paicuna purinapi ama ima illajlla cachun ayudangui.

¹⁴ Can chashna rurajta ricushpami ñucanchijpura crijcunapish allita ruranata, ima illajcunamanpish cunata yachangacuna. Chashnami paicunapish Diospaj ñaupajpica p'ucushca granoyuj cangacuna.

Dios allicunata cuchun nishpa tucuchishcami

¹⁵ Tucui ñucahuan cajcunapish cantaca alli cashca cachun nincunami. Crij cashpa ñucanchijta c'uyajcunatapish, alli cashca cachun ninmi nipangui. Mana c'uyaipajta c'uyaj canaca tucui cancunahuan cashca cachun. Chashna cachun.