Tito 2 - Dios Rimashca Shimicunami

Imahuan mana chagrushca yachanata yachachichun nishcami

¹ Chaimanta imahuan mana chagrushca yachanata canta yachachishca shinallataj yachachingui.

² Yuyaj c'aricunataca, alli yuyaiyuj, mana pugllarij, yuyaisapa, tucui shunguhuan crij, c'uyaj, mana p'iñarijcuna cachun yachachingui.

³ Yuyaj huarmicunatapish alli cazuj, yangamanta mana juchachij, mana machaj cachun, ashtahuanpish allita yachachijcuna cachun yachachingui.

⁴ Chashna cashpami, chairaj huarmicunataca paicunapaj cusacunata, huahuacunata c'uyaj,

⁵ alli yuyaiyuj, mapa yuyai illaj, paicunapaj huasipi allicunata ruraj, alli shungu, paicunapaj cusacunatapish cazujcuna canata yachachingacuna. Chashna cajpimi, Taita Diospaj shimica mana c'amishca canga.

⁶ Shinallataj chairaj c'aricunatapish alli yuyaiyujcuna cachun yuyachishpa rimai.

⁷ Shujtajcuna ricushpa catichun canllatajpish tucuipi allicunata rurangui. Yachachinapipish tucui shunguhuan, ama pugllarishpa yachachingui.

⁸ Mana juchachipaj sumaj shimicunahuan rimangui. Chashna cajpimi p'iñajca, pingarishpa cancunataca mana allicunami nishpa mana juchachi tucunga.

⁹ Amopajta rurajcunataca paicunapaj amocunata cazujcuna cachun, tucui imapipish amo munashcata rurajcuna cachun, ama c'ariyajcuna cachun,

¹⁰ ama shuhuacuna cachun, ashtahuanpish tucui imapipish alli nishcacuna cachun yuyachishpa rimai. Chaimi ñucanchijta Quishpichij Diospaj yachanaca, sumaj cashcata yachangacuna.

¹¹ Diosca tucui cai pachapi causajcunata quishpichingapajmi paipaj mana c'uyaipajta c'uyaitaca ricuchirca.

¹² Paimi ñucanchijtaca Diospaj tucushpa, cai pacha millai munaicunatapish saquishpa, cai causaipica alli yuyaihuan cashcata rurashpa, Diospajlla causachun yachachin.

¹³ Chaimi ñucanchij jatun Dios Quishpichij Jesucristo sumaj cashcahuan shamunataca, ñucanchijca chai yuyailla cushijlla shuyacunchij.

¹⁴ Tucui millaimanta llujshichishpa paipajlla pueblo cachun chuyayachishpa, paipajllata rurana yuyailla cajta rurangapajmi paillataj ñucanchijmanta curirca.

¹⁵ Cantaca pi ama yanganchichun. Cai yachachishcacunahuanca ama manchashpa yuyachishpa sinchita rimangui.