Santiago 2 - Dios Rimashca Shimicunami

Ñahuita ricushpalla alli nijcunata cunashcami

¹ Ñuca huauquicunalla, ñucanchij sumaj Mandaj Jesucristopi cancuna crishcaca, ñahuita ricushpalla alli ninapajca ama cachun.

² Cancunapaj tandanacuiman shuj runa curi sortijasta, achij nicuj churanata churashca yaicungachari. Shuj huajcha runapish tsunzu churanata churashca yaicujpica,

³ achij nicuj churanata churashca runatarajmi cushicushpa ricushpaca: “Canca cai alli tiyarinapi tiyaripai” ninguichij. Shinallataj huajcha runataca: “Canca chaillapi shayacui” mana cashpaca, “Cai pambapi tiyari” ninguichijmi.

⁴ Chashna rurashpaca ¿manachu cancunapurallataj ñahuita ricushpalla llaquichij mana alli juezcuna tucucunguichij?

⁵ Ñuca c'uyashca huauquicunalla, caita uyaichij: Cancunataca cai pachapica huajchacunatami Diosca agllashca. Crishcapica charijcuna cachun, pai cusha nishca mandanapi japijcuna cachunmi chashna agllashca. Chaitaca paita c'uyajcunamanmi cusha nishca.

⁶ Ashtahuanpish cancunaca, huajchacunatami pingachishcanguichij. ¿Manachu charijcunaca cancunata llaquichincuna? ¿Manachu paicunallataj cancunataca mandajcunapajman sirijta aisancuna?

⁷ ¿Manachu cancunapaj jahuapi maquicunata churashpa rimashca alli shutita paicunaca c'amincuna?

⁸ Quillcachishcapica: “Quiquin c'uyarij shinallataj shujtajcunatapish c'uyangui” nishca tucuita yalli jatun mandashcata pajtachishpatajca, allitami ruranguichij.

⁹ Ashtahuanpish cancunaca ñahuita ricushpalla alli nishpaca, juchatami ruranguichij. Mandashcata p'aquijcuna shinallatajmi juchachishca saquiringuichij.

¹⁰ Mandashcapi nishcacunata tucuita pajtachicushpapish shujpi pandarishpaca, tucuita mana pajtachishca shinallatajmi tucun.

¹¹ Dios mandashcallatajmi: “Ama huainayangui” nirca. Shinallataj: “Ama huañuchingui” nircapishmi. Caita nishca shinaca, mana huainayashpapish huañuchishpaca, Mandashcatami p'aquishcangui.

¹² Diosca cancunata cacharichij mandashcallahuantajmi cancuna imalla rurashcataca ricuchinga. Chaita yachashcamanta chashna rimaichij, chashna causaichij.

¹³ Imamantapish maijanta mana llaquishpa llaquichijtaca, paitapish mana llaquishpallataj llaquichishcami canga. Llaquij canaca, llaquichishca canatami mishan.

Ima allita mana rurajpica crishcapish huañushca shinallatajmi nishcami

¹⁴ Ñuca huauquicunalla, maijanpish crijmi cani nishpapish ima allita rurashcacuna illajllaca ¿ima allitaj cangari? ¿Crishcallahuanca quishpiri tucungachu?

¹⁵ Shuj huauqui cashpa, pani cashpapish, punllanta churanapaj, micunapaj illajlla cajta ricushca jahua,

¹⁶ cancunamanta maijancunaca: “Allita churashpa, allita micushpa, sumajta causagrilla” ningachari. Ashtahuanpish cuerpopaj ima illashcata mana cushpaca ¿allichu canga?

¹⁷ Shinallataj ima allita mana rurajpica, crishcapish tucui huañushcatajmi.

¹⁸ Ashtahuanpish maijanca: “Canca crijmi cangui. Ñucaca allicunata rurajmi cani. Allicunata mana rurashpa cambaj crishcata ricuchi. Ñuca crishcataca allicunata rurashcahuanmi ricuchisha” ningachari.

¹⁹ Shujlla Dios tiyashcata can crishpaca, allitamari rurangui. Supaicunapish crincunami, chujchuncunapishmi.

²⁰ Yuyai illaj runa, allicunata mana rurajpica, crishcapish huañushca cajtaca ¿manachu yachangui?

²¹ ¿Manachu ñucanchij yaya Abrahamca, paipaj churi Isaacta altarpi rupachinapaj cushcamanta justificashca tucushca?

²² Paica chashna rurashpami crishcataca ricuchishca. Pai crishcapish allicunata rurashcahuan tandalla cashpa ashtahuan alli tucushcataca ¿manachu ricungui?

²³ Chaita pajtachishcatami Quillcachishcapica: “Abrahamca Diostami crirca. Chaimi cashcata rurajta shina chasquirca, Diospaj amigo nishcapishmi tucurca” nicunmi.

²⁴ Shina cajpica crishcallamanta mana chasquishcata, ashtahuanpish allicunata rurashcacunamantapish chasquishcataca ñami ricunguichij.

²⁵ ¿Manachu huainayashpa causaj Rahab huarmipish, ricunaman rijcunata chasquishpa, shujtaj ñanta cachashcamanta justificashca carca?

²⁶ Ima shinami alma illajlla cuerpoca huañushca. Chashnallatajmi ima rurashcacuna illajlla crijca huañushcallataj.