Santiago 1 - Dios Rimashca Shimicunami

Allillachu canguichij nishcami

¹ Taita Diospajtapish, Mandaj Jesucristopajtapish ruraj Santiagomi cani. Caita chaita rishca chunga ishqui aillucunatami allilla cashca cachun nini.

Yachaisapa canaca Diosmantami shamun

² Ñuca huauquicunalla, ch'ican ch'ican llaquicunahuan cashpapish, ucu shungumanta cushicuichij.

³ Cancuna crijtaj cashcata ricuchij llaquica, mana p'iñarij canata cuj cashcataca yachanguichijmi.

⁴ Chashna alli shungu cashca ricuringapajca alli caichij. Chashna cashpami imapish mana illaj, ña alli crijcunataj canguichij.

⁵ Cancunamanta maijan yachai illaj cashpaca, Diosta mañaichij. Paica mana mitsashpami, tucuicunaman yallijta cunga.

⁶ Ashtahuanpish ama caita chaita yuyashpa cunataj cashcata yuyashpa mañaichij. Maijanpish caita chaita yuyashpa mañajca, huaira caiman chaiman apajpi huajtaricuj mama cucha shinami.

⁷ Maijanpish chashna mañajca, Jatun Diosmanta imallatapish chasquinataca ama yuyachun.

⁸ Chashna ishqui yuyaiyuj runaca, paipaj tucui causaipimi mana alli causan.

⁹ Imata mana charij huauquica, Dios jatunyachina cashcamanta cushicuchun.

¹⁰ Maijanpish achcata charijca, Dios quichujpica cushicuchun. Pai charij canaca q'uihua sisa chaquirij shinami tucunga.

¹¹ Q'uihuaca inti llujshishpa achcata rupachijpica, chaquirinmi. Paita sumajyachij sisa urmajpica, pai sumaj cashcapish chingarinmi. Shinallatajmi achcata charijca, paipaj charinacunandij tucuringa.

Crijtaj cashcata ricuchij llaquita mishanami

¹² Ima millai yuyaicuna shamujpipish chaita mishaj runaca cushichishcami canga. Chai millai yuyaicunata mishajca causaipaj coronatami chasquinga. Diosca paita c'uyajcunamanmi cusha nishca.

¹³ Maijanpajman ima millai yuyaicuna shamujpica, Diosmantami shamun ama nichun. Diosca ima millai yuyaitaca mana charinchu. Paica piman ima millai yuyaitaca mana cunchu.

¹⁴ Ashtahuanpish imapish millaita rurana yuyaica quiquinllapitaj tiyashpami, pita cashpapish chashna mana allitaca rurachin.

¹⁵ Chai millai yuyaicunata chichushca q'uipami, juchaca huacharin. Chai juchapi catijpica, huañuitami cun.

¹⁶ Ñuca c'uyashca huauquicunalla, ama pandarichijchu.

¹⁷ Tucui alli charinacuna, imatapish allita ruranacunaca jahuamantami shamun. Paica achijyachijcunata ruraj Yayami. Paica mana shujtajyanchu, paitaca llandullapish mana amsayachinchu.

¹⁸ Pai munashcamantami mana llulla shimimanta pai rurashcacunapaj punta p'ucushca grano shina cachun, ñucanchijtaca mushujyachirca.

Diospaj Shimi nishcataca rurajcunataj caichij nishcami

¹⁹ Chaimanta ñuca c'uyashca huauquicuna, imatapish uyanataca alli uyaichij. Manaraj alli yuyarishpaca ama rimaichijchu, ama utca p'iñarichijchu.

²⁰ P'iñarijlla runaca, Diospaj munaitaca mana rurai tucunchu.

²¹ Chaimanta millanana yuyaita, millai ruranacunatapish tucui saquishpa, Diospaj Shimita cancunaman huillashcataca alli shunguhuan chasquichij. Chaimi cancunataca quishpichi tucun.

²² Diospaj Shimi nishca shina rurajcuna caichij, ama uyajcunalla caichijchu. Chashna tucushpaca, cancunallatajmi umaringuichij.

²³ Maijanpish Diospaj Shimita uyashca jahua mana chaita rurajca, espejopi paipaj ñahuita ricurij runa shinallami.

²⁴ Pai ima shina cashcata ricurishpa rishca q'uipaca, ima shina cashcatapish cungarinllami.

²⁵ Ashtahuanpish cashcata ruraj mandashcaca, huatashcamanta cacharijmi. Chaita ricurashpa, uyarashpa, mana cungarishpa chaitataj rurashpa catirajca, pai imata ruracunpi cushichishcami canga.

²⁶ Maijanpish cancunapurapi pai crishcapi allimi caticuni yuyashpapish, paipaj c'alluta mana jarcarijca, paipaj shungupimi umarin. Pai caticushcapish yangami.

²⁷ Dios Yayata crijtaj cashcata paipaj ñaupajpi ricuchingapajca caitami rurana: Yaya mama illajcunata, llaquihuan caj viudacunatapish ayudana, cai pacha mapacunamantapish huaquichirinami.