SALMOS 98 - Dios Rimashca Shimicunami

SALMO 98 Taita Diosca cashcata ruraj cajpi alabashcami

Caica Salmomi.

¹ Mandaj Diostaca, mushuj cantota cantaichigari. Jatun mancharinacunata rurashcamanta cantaichigari. Paipaj alli maquihuanmari quishpichishca. Paipaj jucha illaj rigrahuanmari mishachishca.

² Mandaj Diosca pai quishpichinatami ricuchishca. Pai cashcata ruranatamari llajtacunaman ricuchishca.

³ Israelcunapajca llaquij cashcatapish, mana llulla cashcatapishmi yuyarirca. Tucui cai pachapi causajcunamari ñucanchij Taita Dios quishpichinataca ricushcacuna.

⁴ Tucui cai pachapi causajcuna, Mandaj Diosta cushicushpa cantaichigari. Sinchita cantaichij, maquicunahuan huajtashpa salmocunata cantaichigari.

⁵ Mandaj Diostaca, arpacunahuan salmocunata cantaichigari. Cuerdayujcuna tononchishcahuan sumajta cantaichigari.

⁶ Trompetacunapi, bocinacunapi sinchita tocaichigari. Mandaj Jatun Diospaj ñaupajpi cantaichigari.

⁷ Mama cucha huajiaiyari. Chaipi imalla tiyajcunapish huajiaichigari. Cai pachapish, tucui chaipi imalla tiyajcunapish huajiachigari.

⁸ Jatun yacucunapish maquicunata cuyuchichigari. Tucui urcucunapish jatunta cushicuichigari.

⁹ Mandaj Diosca cai pachata mandangapaj ñami shamucun. Paica cai pachataca cashcata rurashpami mandanga. Tucuicunata cashcata rurashpami mandanga. Mandaj Diospaj ñaupajpi cushicuichigari.