SALMOS 96 - Dios Rimashca Shimicunami

SALMO 96 Mandaj Diosta alabashpa cantanami

¹ Mandaj Diostaca mushuj cantohuan cantaichigari. Mandaj Diostaca tucui cai pachapi causajcuna cantaichigari.

² Mandaj Diostaca cantaichigari. Paipaj shutitaca alli nichigari. Pai quishpichij cashcataca, punllanta huillaichigari.

³ Pai sumaj cashcataca, tucui llajtacunapi huillaichigari. Mancharinacunata ruraj cashcataca tucuicunaman huillaichigari.

⁴ Mandaj Diosca jatunmari, tucuimanta yalli alabashca cana Diosmari. Tucui dioscunapaj jahuapi caj manchana Diosmari.

⁵ Tucui shujtajcunapaj dioscunaca, maquihuan rurashca dioscunallamari. Ashtahuanpish Mandaj Diosca jahua pachata ruraj Diosmari.

⁶ Paipaj ñaupajpica mandaj, sumaj achij nicujmi tiyan. Paipajlla huasipica tucuita rurai tucuj, achij nicujmi tiyan.

⁷ Ch'ican ch'ican familia cashpapish Mandaj Diosmanca alli nishca canata cuichigari. Jatunmi cangui, tucuita rurai tucujmi cangui nishcata cuichigari.

⁸ Paiman cuna cashcata apashpa, paipaj huasi canllaman shamuichigari. Mandaj Diospaj shutitaca pai munashca shinataj alli nichigari.

⁹ Adorana churanata churarishca Mandaj Diostaca adoraichigari. Tucui cai pachapi causajcuna Mandaj Diospaj ñaupajpi manchaihuan caichigari.

¹⁰ Llajtacunapi causajcunamanca: “Mandaj Diosca Jatun Mandajmi” nichij. Cai pachataca, sinchitami rurarca, mana cuyuchishcachu canga. Paica cai pachapi causajcunataca cashcata rurashpami mandanga.

¹¹ Jahua pachapish cushicuichigari. Cai pachapish cushicuichigari. Mama cuchapish, chaipi imalla tiyajcunapish huajiaichigari.

¹² Allpapish, chaipi imalla tiyajcunapish jatunta cushicuichigari. Yura chagrapish yallitaj cushicuihuan jundami canga.

¹³ Mandaj Diosca cai pachata mandangapaj ñami shamucun. Paica cai pachataca cashcata rurashpami mandanga. Gentecunataca mana llullaj canahuanmi mandanga. Paipaj ñaupajpi cushicunguichij.