SALMOS 95 - Dios Rimashca Shimicunami

SALMO 95 Taita Diosta alabashpa cantanami, adorashpa cantanami

¹ Mandaj Diostaca cushicuihuan caparishpa cantangapaj shamuichigari. Ñucanchij quishpirina jatun rumitaca caparishpa cantashunchigari.

² Paipaj ñaupajpi alabanapaj jacuchigari. Sumaj cantocunahuan alabashunchigari.

³ Mandaj Diosca Jatun Diosmari, tucui dioscunapaj jahuapi caj Jatun Mandajmari.

⁴ Allpa ucujman imalla tiyajcunapish, paipaj maquipimari. Tucui jatun urcucunapish paipajllatajmari.

⁵ Mama cuchapish paipajllatajmari, paimari rurarca. Chaquishca allpatapish paipaj maquihuanmari rurarca.

⁶ Shamuichij, adorashunchij, Shamuichij paipaj ñaupajpi cumurishunchij. Ñucanchijta ruraj Mandaj Diospaj ñaupajpi cungurishunchij.

⁷ Paica ñucanchij Taita Diosmari. Ñucanchijca paipaj michina pambacunapi causaj gentecunamari canchij. Paipaj maquipi caj ovejacunamari canchij. Cunan paipaj rimashcata uyashcataj cashpaca:

⁸ “Meribapi shina ama rumi shungu tucunguichijchu. Masah shuti shitashca pambapi rurashca shinapish, ama rumi shungu tucunguichijchu.

⁹ Chaipimi cancunapaj ñaupa yayacunaca, caita chaita rurai nircacuna. Ñuca imallata rurashcata ricushca jahuallatajmi caita chaita rurai nircacuna.

¹⁰ Chaimi tucui paicunahuan chuscu chunga huatata p'iña carcani. Chaimantami paicunataca: Cai runacunaca q'uilla shungucunami, ñuca ñantapish mana rijsincunachu nircani.

¹¹ Chaimanta yallitaj p'iñarishpami, ñuca samachina llajtamanca manataj yaicuchinata yuyarircani” ninmi.