SALMOS 94 - Dios Rimashca Shimicunami

SALMO 94 Llaquichijcunata llaquichichun Taita Diosta mañashcami

¹ Mandaj Dioslla, quiquinca llaquichijcunata llaquichij Taita Diosmari cangui. Llaquichijcunata llaquichij Taita Dios cashcata ricuchiyari.

² Cai pachapaj Juez jatun cashcata ricuchiyari. Jatun tucushcacunamanca paicuna japina cashca shinallataj cuhuayari.

³ Mandaj Dioslla, quiquinta mana rijsijcunaca ¿maicamataj chashna llaquichincungallari? Quiquinta mana rijsijcunaca ¿maicamataj cushicungacunari?

⁴ ¿Maicamataj yanganchishpa urata janajta bullarishpa puringacunari? Millaita rurajcunaca ¿maicamataj yangamanta jatun tucushpa puringacunari?

⁵ Mandaj Dioslla, quiquinpajlla cajcunatamari sarucuncuna. Quiquinpajlla cajcunatamari llaquichicuncuna.

⁶ Viudacunata, shujtaj llajtamanta cajcunatamari huañuchincuna. Yaya mama illaj huahuacunatamari causaita quichuncuna.

⁷ “Mandaj Diosca mana ricucunchu. Jacobpaj Taita Diosca imata ruracujtapish mana yachanchu” nincunami.

⁸ Rumi shungu runacuna entendichigari. Upa runacuna ¿ima horastaj yachaisapa tucunguichigari?

⁹ Rinrinta ruraj Diosca ¿maitataj mana uyangari? Ñahuita ruraj Diosca ¿maitataj mana ricucungari?

¹⁰ Llajtacunata llaquichij Diosca, ¿maitataj mana llaquichingari? Yachaita ruranata runacunaman yachachij Diosca ¿maitataj imata mana yachangari?

¹¹ Mandaj Diosca runacuna yuyashcacunaca yangalla cashcataca tucuitamari yachan.

¹² Mandaj Dioslla, quiquin cunashca runaca cushijllamari. Quiquinpaj mandashcata yachachishca runaca cushijllamari.

¹³ Llaqui punllacunapi samarichunmari chashna yachachishcangui. Ashtahuanpish Diosta mana rijsijcunapajca jutcutamari ruracungui.

¹⁴ Mandaj Diosca, paipaj cajcunataca manataj shitangachu. Paipaj cajcunataca manataj shitashcata saquingachu.

¹⁵ Ashtahuanpish cashcata ruraj mandajcunami tiyanga. Shungupi ima millai yuyaita mana charijcunami chaicunataca catingacuna.

¹⁶ Millaita rurajcuna ñucata llaquichinaman jatarijpica, ñucata mitsanapajca pi mana jatarinchu. Ñucapuraca pi mana tucunchu.

¹⁷ Mandaj Dios mana ayudashca cajpica, utcamari huañuiman carcani. Ñamari huañushpa chulunllapi siricuiman carcani.

¹⁸ “Ñuca chaqui lluchcaricunca” nishpa ñuca huillajpica, Mandaj Dioslla quiquin llaquij cashcahuanmi charihuarcangui.

¹⁹ Yallitaj yuyaicunahuan ñuca yuyaipi cajpica, quiquinpaj cushicuimari ñuca almataca cushichirca.

²⁰ ¿Millai mandajcunaca quiquinhuanca tandalla cai tucunchu? Quiquinpaj mandashcapi nishca shina ruracuj tucushpami ashtahuan millaita rurancuna.

²¹ Cashcata rurajta huañuchingapajmi tandanacushpa yuyarincuna. Manapish ima millaita rurajtami huañunami can nincuna.

²² Shina cajpipish Mandaj Diosmari ñuca paca tucunaca cashca. Ñuca Taita Diosca ñucapajca, miticuna jatun rumimari. Paipimi ñuca shunguta churarcani.

²³ Paimari millaicunapaj juchataca, paicunapaj jahuallamantaj tigrachinga. Paicuna millaita rurashcallapitajmari paicunataca chingachinga. Ñucanchijta Mandaj Taita Diosmi paicunataca tucuchinga.