SALMOS 91 - Dios Rimashca Shimicunami

SALMO 91 Pailla Tucuita Rurai Tucujpaj llandupi causanami

¹ Maijanpish jahua pacha Taita Dios ugllashca causacujca, Pailla Tucuita Rurai Tucujpaj llandu ucupimi causan.

² Chaimantami ñucaca Mandaj Diostaca: “Quiquinca ñuca shuyana, ñuca miticunami cangui. Ñuca shunguta churana Dioslla” nisha.

³ Paimi cantaca laziyajpaj huascamanta cacharichinga. Chingachij ungüimantapish paimi quishpichinga.

⁴ Paipaj plumacunahuanmi cantaca pacanga. Paipaj alas ucupica imata mana manchashpami causangui. Paipaj mana llullaj shimica escudo shina, cara churana shinami huaquichinga.

⁵ Tutapish imata mana manchanguichu. Flechacunata punlla shitacujpipish mana manchanguichu.

⁶ Amsapi purij ungüitapish, mana manchanguichu. Huañuchij ungüi chaupi punllapi chingachinatapish mana manchanguichu.

⁷ Cambaj lluqui ladomanca shuj huaranga runacunami urmangacuna. Cambaj alli ladomanpish chunga huaranga runacunami urmangacuna. Ashtahuanpish cantaca imata mana rurangacunachu.

⁸ Diosta mana rijsijcuna paicuna japina cashcaca imalla cashcataca, cambaj ñahuihuantajmi ricungui.

⁹ Ñuca shuyana Mandaj Diosllatatajmari shuyacushcangui. Jahua pacha Taita Diosllatatajmari can causana huasita rurashcangui.

¹⁰ Cambaj jahuamanca ima llaquipish mana shamungachu. Cambaj huasimanpish ima ungüi mana chayangachu.

¹¹ Tucui cambaj ñanpi huaquichichunca, cambajmanca paipaj angelcunatamari cachanga.

¹² Paicunami cambaj chaquicuna rumipi ama ñitcarichunpish paicunapaj maquicunapi apanga.

¹³ Leonpaj jahuapipish, víbora culebrapaj jahuapipish canmi sarungui. Malta leontapish, dragontapish canmi huañuchingui.

¹⁴ “Paipish ñucata c'uyashcamantaca, paitapish cacharichishami. Ñuca shutita rijsishcamantaca paitapish jatun canapimi churasha.

¹⁵ Ñucata mañajpica ñucapish cutichishami. Llaquihuan cajpipish, ñucapish paihuanmi casha. Paitaca cacharichishami, sumajyachishami.

¹⁶ Achca huatata causanatami cusha. Ñuca quishpichij cashcata ricuchishami”.