SALMOS 90 - Dios Rimashca Shimicunami

SALMO 90 LIBRO IV (Salmos 90–106 ) Diosca huiñaipajmi, runaca tucurijllami

Diospaj runa Moisés Diosta mañashcami.

¹ Jatun Dios, quiquinca ñucanchij miticunami cangui. Ñucanchij huahua huahuacuna miticunami cangui.

² Urcucunapish manaraj huacharijpimi ña tiyashcangui. Allpatapish, cai pachatapish manaraj rurashpami huiñaimanta huiñaicama ña tiyaj Dios cangui.

³ Runacunataca ñutu allpallamantaj tigrachijmi cangui. “Huañujlla runa, ñutu allpa tucuilla nijpica” chashna tucunllami.

⁴ Huaranga huatacunaca quiquinpaj ñahuipica caina punlla chishiyashca shinallami. Shuj tutapi asha horascuna pasaj shinallami.

⁵ Runacunataca, jatun yacuhuan apaj shinami chingachingui. Muscui shinallamari chingachingui. Tutamantaman huiñaj q'uihua shinallacunamari.

⁶ Q'uihuaca tutamantamanca sisashca verdijlla huiñacuj cashpapish, p'itijpica chishipajca chaquirinllami.

⁷ Quiquin yallitaj p'iñarishcahuanmi chingachishca canchij. Quiquin p'iñarishcahuanca musparishcami canchij.

⁸ Ñucanchij millaita rurashcataca, quiquinpaj ñaupajpimi charicungui. Ñucanchij pacalla juchallishcacunapish quiquinpaj ñaupajpica ricunallami.

⁹ Quiquin p'iñarijpica ñucanchij causaica tucurinllami. Ñucanchij huatacunaca imata yuyaricushca shinalla chingarinllami.

¹⁰ Ñucanchij causana punllacunaca canchis chunga huatallami. Ashtahuan sinchicunapish pusaj chunga huatallatami causan. Unita causaj sinchi runa nishca cashpapish, llaquita, c'uyaillatami causan. Tucuicunami ñucanchij shinallataj utca tucurinllacuna.

¹¹ Quiquin p'iñarishcaca yallitaj mana jahualla cashcataca ¿pitaj entendi tucungari? Manchana shinataj manchachun quiquin yallitaj p'iñaricushcataca ¿pitaj entendi tucungari?

¹² Ñucanchij causai punllacunaca ima shina cashcata yupanata yachachihuayari. Ñucanchij shunguman alli yachaita apamunatapish yachachihuayari.

¹³ Mandaj Dioslla, ¿maicamataj ñucanchijtaca shitangui? Utca tigramuyari. Quiquinpajta rurajcunataca llaquihuayari.

¹⁴ Tutamantaca quiquinpaj llaquij canata jundachihuayari. Ñucanchij tucui causaipimari cushicushpa cantashun.

¹⁵ Ñucanchijtaca mashna huatacunata llaquichishca cashpaca chai huatacunallatataj cushichihuayari. Mashna huatacunatami llaquita causarcanchij, chai huatacunallatataj cushichihuayari.

¹⁶ Quiquin rurashcacunataca quiquinpajta rurajcunaman ricuchiyari. Quiquin sumaj cashcahuanca paicunapaj huahuacunapaj jahuapi cayari.

¹⁷ Ñucanchij Taita Dioslla Mandaj Diospaj luzca ñucanchij jahuapi cashca ricurichun. Ñucanchij rurashcacuna allitaj cajpica ñucanchij maquihuan rurashcacunataca sinchi cashcata ricuchiyari.