SALMOS 9 - Dios Rimashca Shimicunami

SALMO 9 Cashcata ruraj Dios cajpi pagui nishcami

Mut-labén nishca tonota alli yachaj cantachichun, David rurashca Salmomi.

¹ Mandaj Dioslla, tucui ñuca shunguhuanmi canta alabasha. Mancharinacunata can rurashcataca, tucuitami parlasha.

² Cushicushami, canpimi jatunta cushicusha. Jahua pachapi caj, cambaj shutitami cantasha.

³ Ñucata p'iñajcunaca can ricurijpica huashaman tigranllacunami, urmashpa chingarinllacunami.

⁴ Ñucataca mitsanataj cashcamantaca mitsashcanguimi. Can tiyanapi tiyarishpami, ima shina cashcatataj ricushpa cashcatataj rurashcangui.

⁵ Llajtacunapi causaj canta mana manchajcunataca, sinchitami rimarcangui. Millaitaca chingachircanguimi. Paicunapaj shutitapish huiñai huiñaipajmi p'icharcangui.

⁶ Ñucata p'iñajcunaca chingarishcamari. Paicuna causana pueblocunapish huiñaipajmi shitashca saquirishca. Chai pueblocunataca canmari ñutuchishcangui. Yuyarinapaj cachunllapish mana saquishcanguichu.

⁷ Mandaj Diosca huiñaitami mandanga. Paica imalla rurashcata ricuchingapaj tiyarinatapish ñami allichishca.

⁸ Cai pachapi causajcunataca cashcatataj rurashpami mandanga. Paica mana ñahuita ricushpalla mandangachu.

⁹ Mandaj Diosca huajchacuna miticunami. Llaqui punllacunapi paca tucunami.

¹⁰ Mandaj Dioslla, cambaj shutita rijsijcunaca, canpimi shunguta churangacuna. Canta mashcajcunataca manataj shitashcata saquinguichu.

¹¹ Sionpi causaj Mandaj Diosta cantaichij. Pai imalla rurashcataca shujtajcunamanpish huillaichij.

¹² Diosca huañuchishcamanta paitapish llaquichinataca mana cungarircachu. Llaquihuan cajcuna caparishpa mañashcatapish, mana cungarircachu.

¹³ Mandaj Dioslla, ñucata llaquihuayari. Ñucata p'iñajcuna llaquichicujpi llaquita apacujtaca ricuhuayari. Ñuca huañui pungullapi cajpipish canmi quishpichingui.

¹⁴ Cantaca alabanataj cashcata Sionpi causajcunapaj pungucunapi huillachunmi quishpichingui. Can quishpichishcamantaca, jatuntami cushicuni.

¹⁵ Shujtaj llajtacunapi causajcunaca, paicunallataj rurashca jutcupimi huashicurcacuna. Paicunallataj pacashpa churashca linchillapitajmi chaquicuna churarishpa urmashcacuna.

¹⁶ Mandaj Diosca paicunataca paicuna ima shina cashcatataj ricuchishpami llaquichin. Chashnami paica Diostaj cashcata ricuchin. Millaicunaca shujtajcunata urmachingapaj paicunapaj maquihuan churashcallapitajmi urmancuna. Higaión. Selah

¹⁷ Diosta cungarij llajtacunata, paita p'iñaj millaicunataca Seolmanmari tucuicunata shitanga.

¹⁸ Huajchacunataca huiñaipajtajca mana cungashcachu. Paicuna shuyacushcataca mana yanga shuyacungallachu.

¹⁹ Mandaj Dioslla, shayariyari. Runacuna jatun tucuchunca ama saquichu. Llajtacuna ima shinalla rurashcataca, cambaj ñaupajpi ricuchishca cachun.

²⁰ Mandaj Dioslla, manchana yuyaita paicunapi churayari, tucui llajtapi causajcunataca runacunalla cashcata, paicunaca manapish ima cashcata ricuchiyari. Selah