SALMOS 89 - Dios Rimashca Shimicunami

SALMO 89 Davidhuan Taita Dios ari ninacushcami

Sumaj shimicunahuan ezraita nishca Etán rurashca Salmomi.

¹ Mandaj Dioslla, quiquin llaquij cashcataca cantacushallami. Ñuca shimihuanmi quiquin alli cashcataca huahua huahuacunaman huillacushalla.

² Ñucaca: “Quiquin llaquinaca huiñaipaj shayachishcami canga. Quiquin mana llullaj canatapish jahua pachallapitajmi sinchita churashcangui” nircanimi.

³ Ñuca agllashcahuanmi ari ninacurcani. Ñucapajta ruraj Davidmanmi caita rurashatajmi nishpa cashna nircani:

⁴ “Huiñaitami cambaj huahua huahuataca mandaj cachun churasha. Can mandanapica cambaj huahua huahuacunami mandacungalla” nircanimi. Selah

⁵ Mandaj Dioslla, mancharinacunata quiquin rurashcataca jahua pachapipish alabancunami. Quiquin pajtachij cashcataca, jucha illajcuna tandanacushcapimi alabangacuna.

⁶ Jahua pachapipish quiquin Mandaj Dioshuan ch'imbapuraipajca, pi mana tiyanchu. Diospaj churipuracunapica quiquin Mandaj Dioshuan ch'imbapuraipajca ¿pitaj tiyangari?

⁷ Jucha illajcuna achca tandanacushcapica manchana Taita Diosmari cangui. Tucui cambaj muyundijpi tiyacujcuna chujchuna Taita Diosmari cangui.

⁸ Mandaj Dioslla, tucuita Mandaj Taita Dioslla ¿pitaj quiquin shinaca tiyangari? Mandaj Dioslla tucuita rurai tucujmi cangui. Quiquinpaj pajtachij cashcahuan muyunchishcamari cangui.

⁹ Mama cucha p'iñarishpa huajiajpipish quiquinca mandai tucunguimi. Yacucuna t'imburishpa jatarijpipish, quiquinca casijlla cachun mandanguillami.

¹⁰ Quiquinmi Rahabtapish chugrichishca huañunalla siricujta shinalla huañuchircangui. Quiquinta p'iñajcunataca tucuita rurai tucuj quiquinpaj rigrahuanmi caita chaita cacharcangui.

¹¹ Jahua pachacunapish quiquinpajmi. Cai pachapish quiquinpajllatajmi. Quiquinmari cai pachatapish, cai pachapi tucui imalla tiyajcunatapish callarichircangui.

¹² Janaj ladotapish ura ladotapish quiquinmari rurarcangui. Tabor urcupish, Hermón urcupish quiquinpaj shutipimari cantangacuna.

¹³ Tucuita rurai tucuj rigraca quiquinpajmari. Quiquinpaj maquica tucui rurai tucujmari. Quiquinpaj alli lado maquica tucuicuna jatunyachishcamari.

¹⁴ Cashcata rurashpa mandashcahuan, mandana shinataj mandashcahuanmi paipaj tiyanataca callari rumita sinchita churashca shina sinchita charicun. Llaquij cana, imatapish pajtachij canami quiquinta ñaupanga.

¹⁵ Mandaj Dioslla, quiquinta mañajcunaca cushichishcami. Quiquinpaj ñahui achijyachishcapimi puringacuna.

¹⁶ Quiquinpaj shutipimi punllanta cushicungacuna. Quiquin cashcata rurashcapimi c'ari c'ari cangacuna.

¹⁷ Quiquinmi paicuna fuerzayuj canapish jatun canapish cangui. Quiquin munashcamantami ñucanchijmanca poderyuj canata cungui.

¹⁸ Mandaj Diosca ñucanchij escudomari. Israelcunapaj jucha illaj Diosca ñucanchijta jatun mandajmari.

¹⁹ Quiquinpaj jucha illaj runamanmi muscuipi shina rimashpa cashna nircangui: “Ñuca ayudanataca c'ari c'ari cajmanmi curcani. Ñucapajlla cajcunamanta shujta agllashpami jatunyachircani” nircanguimi.

²⁰ Ñucapajta ruraj Davidtamari japircani. Ñucapajlla cachun ch'icanchina aceitehuanmi paipaj umapi tallircani.

²¹ Ñuca maquica huiñaitami paihuan canga. Ñuca rigrapish paitaca pi mana cuyuchipajtami ruranga.

²² P'iñajpish mana cungaillapi llaquichingachu. Millaita rurajcunapish manataj mishangachu.

²³ Ashtahuanpish paita p'iñajcunataca, paipaj ñaupajpimi ñutusha. Mana ricunachijcunataca tucuchishami.

²⁴ Ñuca mana llullaj canapish, llaquij canapish paihuanmi canga. Pai imata rurai tucunapish ñuca shutipimi jatunyachishca canga.

²⁵ Paipaj maquitaca mama cucha jahuatami churasha. Paipaj alli lado maquitaca jatun yacucuna jahuapimi churasha.

²⁶ Paica ñucataca: “Quiquinmi ñuca Yaya cangui, ñuca Taita Diosmi cangui. Ñucata quishpichij jatun rumimi cangui” nishpami caparinga.

²⁷ Ñucapish paimanca punta churi canatami cusha. Tucui cai pachapi jatun mandajcunapaj jahuapi canatami cusha.

²⁸ Ñuca llaquij canaca paihuanca huiñaipajmi canga. Ñuca paihuan ari ninacushcapish, pi mana cuyuchipajmi canga.

²⁹ Paipaj huahua huahuacuna mandanataca huiñaipajmi churasha. Paipaj mandanaca jahua pacha shinallataj huiñaipajmi canga.

³⁰ Paipaj huahua huahuacuna ñuca mandashcata saquijpica, ñuca yachachishca shina paicuna mana purijpica,

³¹ ñuca chaitataj pajtachichun nishcacunata yanganchishpa, ñuca mandashcacunata mana huaquichijpica,

³² pai mana cazushcamantaca varahuanmi llaquichisha. Pai millaita rurashcamantaca azotishpami llaquichisha.

³³ Shina cashpapish Davidta llaquinataca manataj saquishachu. Ñuca pajtachishatajmi nishcataca mana p'aquishachu.

³⁴ Paipaj rurashatajmi nishcataca manataj saquishachu. Ñuca shimihuan rurashatajmi nishcataca manataj shujtajyachishachu.

³⁵ Ñucaca ima jucha illaj cashpami, shuj cutin pajtachishatajmi nircani. Chaimanta Davidmanca manataj llullashachu.

³⁶ Pai mandanapica paipaj huahua huahuataca mandancungallami. Paicuna mandanaca ñuca ñaupajmantaca inti shina mana anchungachu.

³⁷ Luna shinami paicuna mandanaca huiñaipaj mana cuyuringa. Jahua pachapica ima ricushcata alli huillajmi canga nishcanguimi. Selah

³⁸ Chashna cashpapish quiquinmi shitashcangui. Aceitehuan churashpa mandanapi quiquin churashcatamari yanganchishpa shitashcangui. Quiquinllatajmari paihuanca p'iñarishcangui.

³⁹ Quiquinpajta rurajpaj ari nishcatamari p'aquishcangui. Paipaj coronatapish pambaman urmajtamari yanganchishcangui.

⁴⁰ Tucui paicunapaj pircacunatapish jutcu jutcutamari rurashcangui. Paicunapaj pueblo muyundij pircacunatamari urmachishcangui.

⁴¹ Ñanta tucui pasajcunami imatapish shuhuancuna. Paipaj c'uchullapi cajcunapish yanganchincunamari.

⁴² Paita p'iñajcunapaj alli maquitamari sinchiyachishcangui. Tucui paita llaquichijcunatamari cushichishcangui.

⁴³ Paipaj espadataca, filo illajtami rurashcangui. Pai macanacugrijpipish, mana fuerzata cushcanguichu.

⁴⁴ Pai sumaj cashcataca tucuchishcanguimari. Paipaj jatun tiyanataca pambapimi shitashcangui.

⁴⁵ Chairaj cajtamari ñapish yuyajyachishcangui. Jatun pingaihuanmari pilluchishcangui. Selah

⁴⁶ Mandaj Dioslla, ¿maicamataj chashna ruranguiyari? ¿Shuj cutintajchu miticungui imatagari? ¿Shuj cutintajchu nina sindirij shina p'iñaringui imatagari?

⁴⁷ Ñuca causaica ashapajlla cashcata yuyaripayari. Huañujlla runataca ¿imapajtaj yangaca rurarcanguiyari?

⁴⁸ ¡Maijan runataj causacungallari. Maijan runataj huañuitaca mana ricungari! ¿Seolman ricujtaca paipaj causaitaca quishpichi tucungachu? Selah

⁴⁹ Jatun Dios ¿ñaupa llaquij canaca maipitagari? ¿Quiquinca pajtachij cashca shinataj Davidman ari nishcaca maipitagari?

⁵⁰ Jatun Dios, quiquinpajta rurajcunata yanganchicujtaca yuyaripayari. Achca gentecuna yanganchishpa c'amishcatamari ñuca shungupi charicuni.

⁵¹ Mandaj Dios, quiquinta p'iñajcunamari pingaichincuna. Quiquin churashca jatun mandajtaca cada chaqui sarushcapimi pingaichincuna.

⁵² Mandaj Diosca huiñaita alli nishca cachun. Chashna cachun. Chashna cachun.