SALMOS 88 - Dios Rimashca Shimicunami

SALMO 88 Huañuimanta llujshichishca cangapaj mañashcami

Corepaj huahuacuna cantana Salmomi. Tonota alli yachaj llaquijlla tonopi cantachichun, yachachinapaj ezraíta nishca Hemán rurashca Salmomi.

¹ Mandaj Dioslla ñucata quishpichij Taita Dioslla. Tutapish punllapish quiquinpaj ñaupajpimari mañacuni.

² Ñuca mañashcaca quiquinpaj ñaupajman chayashca cachun. Ñuca mañashcata uyahuayari.

³ Ñuca almaca llaquicunahuan jundamari. Ñuca causaipish Seol c'uchullapimari.

⁴ Ñucaca pambashca canapaj cajcunahuan yupashcamari cani. Fuerza illaj runa shinamari cani.

⁵ Huañushcacunapurapi shitashca shinamari cani. Espadahuan huañuchishpa jutcupi pambashca shinamari cani. Huañushpa quiquinpaj maquimanta cacharirishcacunata ña mana yuyarishca shinami ñucatapish ña mana yuyarishca cani.

⁶ Ucujta caj utcupimari ñucataca churahuashcangui. Yallitaj ucujta amsapimari churahuashcangui.

⁷ Quiquin p'iñarishcaca ñuca jahuapimari. Mama cucha yacu jataricunpimari ñucataca pambashcangui. Selah

⁸ Ñuca rijsishcacunataca ñucamanta caruyachishcanguimari. Paicunapaj p'iñanachinatamari ñucataca rurahuashcangui. Maita mana llujshi tucunapi huichcashcamari cani.

⁹ Ñuca llaquicunamantaca ñuca ñahuicunapish ungushcamari. Mandaj Dioslla, punllantami caparircani. Quiquinpajmanmari ñuca maquicunata chutarcani.

¹⁰ ¿Mancharinacunata quiquin rurashcataca huañushcacunamanchu ricuchingui? Huañushcacunaca ¿quiquinta alabangapaj jataringacunachu? Selah

¹¹ ¿Quiquin llaquij cashcataca huañushcacunata pambashcapica pi huillangachu? ¿Quiquin mana llullaj cashcataca Abadón nishcapica pi huillangachu?

¹² Mancharinacunata quiquin rurashcacunataca amsapi cajcunaca pi yuyaringachu. Tucuita cungarina pachapi cajcunaca ¿cashcata quiquin rurashcataca pi yuyaringachu?

¹³ Mandaj Dioslla, ñucaca quiquintamari caparicuni. Ñuca quiquinta tutamanta mañanapica quiquintami mashcani.

¹⁴ Mandaj Dioslla, ¿ima nishpataj ñucataca p'iñahuanguiyari? ¿Ima nishpataj ñucamanta quiquinpaj ñahuita pacahuanguiyari?

¹⁵ Ima illajlla ñucaca llaquihuanmari cani. Huambramantapachamari quiquin cachashca llaquicunata apani. Yallitaj manchaihuanmari cani.

¹⁶ Quiquin p'iñarishcaca ñuca jahuamanmari shamun. Quiquin llaquichishcacunaca ñucataca yallitajmi llaquichin.

¹⁷ Punllantamari yacu shina ñucataca muyuchishca. Muyujta jatun pata shayacuj shinamari.

¹⁸ Ñuca c'uyashcacunatapish, ñucahuan apanacujcunatapish ñucamanta caruyachishcanguimari. Ñuca rijsishcacunatapish yallitaj amsapimari churashcangui.