SALMOS 87 - Dios Rimashca Shimicunami

SALMO 87 Sión pueblopi causanaca sumajmari

Corepaj huahuacuna cantana Salmomi.

¹ Sión puebloca Diospajlla urcupi callari rumicunata churashpa shayachishcami.

² Jacobpajcuna tucui causajcunamantaca, Mandaj Diosca Sión pungucunatamari yalli c'uyan.

³ Taita Diospaj pueblolla, canmantaca sumaj shimicunatami rimancuna. Selah

⁴ “Rahabpish, Babiloniatapish ñucata rijsijcunapurallataj cashcatami yuyarisha. Filisteapish, Tiropish, Etiopiapish chaillapitajmi huacharishca” nishcami.

⁵ Sionmantaca cashnami ningacuna: “Caipish, chaipish chai pueblopi huacharishcacunami” ningacunami. Jahua pacha Taita Diosllatajmi chai pueblotaca sinchita churanga.

⁶ Mandaj Diosca llajtacunapi causajcunataca: “Caica Sionpimi huacharirca” nishpami quillcanga. Selah

⁷ Chai pueblopica cantajcunapish tocajcunapish: “Ñucanchijpajca tucui imapish cai Sionmantami llujshicun” ningacunami.