SALMOS 86 - Dios Rimashca Shimicunami

SALMO 86 Taita Dios llaquina huashanpi shamuchun mañashcami

David Diosta mañashcami.

¹ Mandaj Dioslla, quiquinpaj rinrinta mañachishpa uyahuayari. Ñucaca llaquilla, ima illajllamari cani.

² Ñucataca huaquichihuayari. Quiquin Diosllata yuyarijmari cani. Ñuca Dioslla quishpichihuayari. Quiquinpi shunguta churaj quiquinpajta rurajtaca quishpichihuayari. Quiquinpimari shunguta churani. Quiquinpajta rurajtaca quishpichihuayari.

³ Mandaj Dioslla, ñucata llaquihuayari. Quiquinllatamari tucui punlla mañani.

⁴ Jatun Dios, ñuca almaca quiquinllatami alaban. Quiquinpajta rurajpaj almata cushichiyari.

⁵ Jatun Dios quiquinca allimari cangui, perdonajmari cangui. Quiquinta mañajcunataca tucuicunata jatunta llaquijmari cangui.

⁶ Mandaj Dioslla, ñuca mañashcata uyahuayari. Ñuca rogashpa mañashcata uyaracuj caiyari.

⁷ Ñuca llaquihuan cai punllapish quiquinllatami cayasha. Ñuca mañashcataca quiquinllami cutichij cangui.

⁸ Jatun Dios, dioscunapaj chaupipica quiquin shinaca pi mana tiyanchu. Quiquinpaj rurashcacunahuanca pi rurashcacunataj igualangari.

⁹ Jatun Dios, quiquin rurashca tucui llajtacunami quiquinpaj ñaupajman shamushpa adorangacuna. Quiquinpaj shutitami sumajyachingacuna.

¹⁰ Quiquinca jatunmi cangui. Mancharinacunata rurajmi cangui. Quiquinllami Taita Dios cangui.

¹¹ Mandaj Dioslla, quiquinpaj ñanta yachachihuayari. Quiquinpaj mana llullapimi purisha. Quiquinpaj shutita manchashpa causanata ñuca shungupi sinchiyachiyari.

¹² Mandaj Dios, ñuca Taita Dioslla quiquintami alabasha. Ñuca tucui shunguhuanmi alabasha. Quiquinpaj shutitaca huiñaitami jatunyachisha.

¹³ Quiquin llaquij cashcaca ñucapajca yallitaj jatunmari. Seol ucujman rinamantamari ñuca almataca quishpichircangui.

¹⁴ Taita Dioslla, jatun tucushcacunaca ñucata llaquichingapajmari jatarishcacuna. Millaicunami tandanacucuncuna. Ñucata ima shina huañuchinatami huashalla yuyarinacucuncuna. Paicunaca ñucanchijta quiquin cuidacushcataca mana yuyancunachu.

¹⁵ Ashtahuanpish quiquin Jatun Diosca llaquij, cashcata ruraj, mana utca p'iñarij, yallitaj llaquij, mana llullaj Taita Diosmari cangui.

¹⁶ Ñucata ricuhuayari, ñucata llaquihuayari. Quiquinpajta rurajmanca quiquinpaj poderta cuhuayari. Quiquinpajta ruraj huarmipaj churita huaquichihuayari.

¹⁷ Ñucapaj allita ruraj cashcata ricuchingapajca ñucata, mancharinacunata rurachipaiyari. Ñucata p'iñajcuna ricushpa pingai tucuchun chashna ricuchiyari. Quiquin Mandaj Diosmari ñucataca ayudarcangui cushichircangui.