SALMOS 84 - Dios Rimashca Shimicunami

SALMO 84 Taita Diospaj huasipi cana munailla cashcami

Tocanapi tocanata alli yachaj cantachichun, Corepaj huahuacunapaj rurashca Salmomi.

¹ Tucuita Mandaj Taita Dioslla, quiquin causana huasica tucuita yalli sumajmari.

² Ñuca almaca Mandaj Diospaj huasi canllapi purinaihuanmari yallitaj huañucun. Ñuca shunguhuan ñuca almahuanca causaj Taita Diostami cantacun.

³ Gorrioncunacamamari quiquinpaj altar c'uchupi paicuna causanata rurancuna. Golondrinacunacamamari paicunapaj huahuacunata huiñachingapaj quiquinpaj altar c'uchupi paicunapaj tazinta rurancuna. Tucuita Mandaj Dioslla, ñuca Jatun Mandajlla, ñuca Taita Dioslla.

⁴ Quiquinpaj huasipi causajcunaca cushijllami. Paicunaca quiquintaca alabacungallacunami. Selah

⁵ Quiquin cushca fuerzata charijcunaca cushijllami. Paicunapaj shungupica Sionman rina ñanpi ña ricushca shinami tiyan.

⁶ Huacana pugru pambata ch'imbashpaca, yacucuna pajchacuj pugrutami rurancuna. Yacu tandana tanquepi yacu jundajtami tamyan.

⁷ Ashtahuan ashtahuan c'ari c'ari tucushpami ringacuna. Sión urcupimi Taita Diosta ricungacuna.

⁸ Mandaj Dioslla, tucuita mandaj Taita Dioslla, ñuca mañashcata uyahuayari. Jacobpaj Taita Dioslla, uyahuayari. Selah

⁹ Taita Dioslla, ñucanchij escudo Taita Dioslla. Quiquinpaj agllashcata chaparana yuyailla cayari.

¹⁰ Shuj punllallatapish quiquinpaj huasi canllapi canaca, huaranga punllacunata shujtajpi canata mai yalli allimari. Millaicuna causacunpi causanata agllanapaj randica, ñuca Taita Diospaj huasi pungupi canatami agllani.

¹¹ Mandaj Taita Diosca ñucanchijta achijyachij intimari. Ñucanchijta huaquichij escudomari. Mandaj Diosca alli nishca canata, sumaj canatamari cunga. Tucuipi mana juchachipaj cajcunamanca paicunapaj cuna cashataca mana anchuchingachu.

¹² Tucuita Mandaj Taita Dioslla, quiquinpi shunguta churajcunaca cushijllamari.