SALMOS 83 - Dios Rimashca Shimicunami

SALMO 83 Israelcunata p'iñajcunata chingachichun Diosta mañashcami

Cantanapaj Asaf rurashca Salmomi.

¹ Taita Dioslla, ama upajlla saquirichu. Taita Dioslla, ama upajlla, casijlla saquirichu.

² Quiquinta p'iñajcunaca mana jahuallatamari capariricuncuna. Quiquinta mana ricunachijcunaca uma alzashcacunamari.

³ Quiquinpajlla cajcunata umana yuyaihuanmari pacalla parlanacushcacuna. Quiquin cuidacushcacunata llaquichingapajmari parlanacushcacuna.

⁴ Paicunaca: “Ama llajta tucuchun chingachingapaj shamuichigari. Israel shutita yuyarina ama tiyachun chingachingapaj shamuichigari” ninacunmari.

⁵ Tucuicunamari shuj shungulla tucushpa llaquichinata ari ninacushcacuna. Caicunami quiquinta p'iñashpa tucuicuna shuj yuyailla tucushcacuna.

⁶ Edomitacuna, ismaelitacuna, moabitacuna, agarenocuna,

⁷ Gebalpi causajcuna, amonitacuna paicunami chashna shuj yuyailla tucushcacuna. Amalecitacunapish, filisteocunapish, Tiropi causajcunapish shuj yuyaillami tucushcacuna.

⁸ Asiriocunapishmari paicunahuanca tandanacushcacuna. Lotpaj huahua huahuacunapajpish rigra shinamari tucushcacuna. Selah

⁹ Paicunataca madianitacunata shina, Sísara runata shina rurayari. Cisón yacu huaicupi Jabinta rurashca shina rurayari.

¹⁰ Paicunaca Endor pueblopimi chingarircacuna. Allpapaj majada tucushpamari saquirircacuna.

¹¹ Paicunapaj soldadocunata mandajcunataca Orebta, Zeebta shinallataj huañuchiyari. Tucui paicunata jatun mandajcunataca Zebata, Zalmunata shinallataj chingachiyari.

¹² Paicunaca: “Dios causanataca ñucanchijpaj cachun japishunchij” nishcacunami carca.

¹³ Ñuca Dioslla, paicunataca acapanapi cachayari. Chaquishca p'angacunata shina huairapi cachayari.

¹⁴ Urcuta ninahuan rupachij shina tucuchiyari. Yuracunata nina rupachij shina chingachiyari.

¹⁵ Quiquinpaj huairandij tamyahuan llaquichishpa catiyari. Quiquinpaj acapanahuan manchachiyari.

¹⁶ Ñahuita maipi mana churai tucujta pingachiyari. Mandaj Dioslla, quiquinpaj shutita mashcachun chashna rurayari.

¹⁷ Paicunaca huiñaipaj muspachishca musparishca cachuncuna. Paicunaca pingaichishca chingarichuncuna.

¹⁸ Chaipimi quiquinpaj shutica Mandaj Dios cashcata yachangacuna. Jahua pachapi caj Taita Diosca quiquinlla cashcata, quiquinlla tucui cai pachata mandaj cashcata yachangacuna.