SALMOS 82 - Dios Rimashca Shimicunami

SALMO 82 Cashcata mana rurashcamanta sinchita rimashcami

Asaf rurashca Salmomi.

¹ Taita Diosca dioscuna tandanacushca chaupimantami jatarin. Dioscunapaj chaupipimi paicuna imallata rurashcata ricushpa cashna nin:

² “¿Maicamataj cancunaca ima rurashcacunata ricuchina cajpipish cashcataca mana ricuchinguichigari? ¿Maicamataj cancunaca millaicunapajraj allita ruranguichigari? Selah

³ Mana mitsari tucujcunata, yaya mama illajcunata mitsaichigari. Llaquihuan cajcunapaj, ima illajlla cajcunapaj cashcata ruraichigari.

⁴ Llaquihuan cajcunata, ima illajllacunata cacharichichigari. Millaicunapaj maquimanta cacharichichigari.

⁵ Mana yachancunachu, mana entendincunachu. Yallitaj amsapimi purincuna. Tucui allpata aparij rumicunapish chujchuncunamari.

⁶ Ñucami cancunataca: Dioscunami canguichij. Tucui cancunami jahua pacha Taita Diospaj churicuna canguichij nircani.

⁷ Chashna cashca cashpapish maijan runacuna huañuj shinallatajmi huañunguichij. Maijan jatun mandajcuna urmaj shinallatajmi urmanguichij” ninmi.

⁸ Jatariyari, Taita Dioslla. Cai pachapi cajcuna paicuna ima shinalla rurashcata ricuchiyari. Tucui llajtacunallatajmari quiquinpaj.