SALMOS 80 - Dios Rimashca Shimicunami

SALMO 80 Cutin allichipailla nishpa caparishpa Diosta mañashcami

Lirio sisacuna nishca cantota, tonota alli yachaj cantachichun, Diosman huillashpa Asaf rurashca Salmomi.

¹ Israelcunata michij uyahuayari. Quiquinca Josepaj huahua huahuacunataca ovejacunata shina michijmi cangui. Querubincunapaj chaupipi cajlla achijyachihuayari.

² Quiquin tucuita rurai tucuj cashcahuan Efrainpaj, Benjaminpaj, Manasespaj ñaupajpi shayariyari. Paicunata quishpichinaman shamuhuayari.

³ Taita Dioslla, ñucanchijtaca mushujyachihuayari. Quiquinpaj ñahuihuan achijchihuayari. Quishpirishcamari cashun.

⁴ Mandaj Dioslla, tucuita mandaj Taita Dioslla, ¿maicamataj p'iñalla canguiyari? ¿maicamataj quiquinpaj cajcuna mañashcataca mana uyanguiyari?

⁵ Ñucanchijmanca huiquillatami cararcangui. Huiquillatami yallitaj ubyachircangui.

⁶ Ñucanchijtaca ñucanchij c'uchullapi cajcuna asicunalla cachunmari churashcangui. Ñucanchijta p'iñajcunaca ñucanchijtaca chanzata ruracunllacunamari.

⁷ Tucuita ruraj Taita Dioslla, ñucanchijtaca mushujyachihuayari. Quiquinpaj ñahuihuan achijyachihuayari. Quishpirishcamari cashun.

⁸ Egiptomantami uva yurata apamurcangui. Cai llajta runacunata llujshichishpa cachashpami chaitaca tarpurcangui.

⁹ Chai yurata churangapajmi allpataca chuyayachircangui. Sapicunatapish ucujtami sapiyachircangui. Tucui allpapimi jundachircangui.

¹⁰ Chai yuraca urcucunatami llandurca. Taita Diospaj cedro yuracunatami chai yurapaj ramacunaca llandurca.

¹¹ Mama cuchacamami ramacunaca huiñarca. Eufrates jatun yacucamami huiñarca.

¹² ¿Ima nishpataj uva chagra muyundij pircataca t'uninguiyari? Ñanta pasajcunamari uvacunataca pallashpa apacuncuna.

¹³ Sacha c'uchicunamari c'utsashpa apancuna. Urcu animalcunamari millpucuncuna.

¹⁴ Tucuita mandaj Taita Dioslla, manatajchu tigra ricungui imatagari. Jahua pachamanta ricuhuayari. Cai uva chagra ima shina cajta ricuj shamuyari.

¹⁵ Chai yuraca quiquinpaj alli maquihuan tarpushcamari. Quiquinpajlla cachunmari sapiyachircangui.

¹⁶ Ninahuan rupachishpa ñutuchishcamari siricun. Chashna rurajcunataca sinchita rimashpa chingachihuayari.

¹⁷ Quiquinpaj alli ladopi caj runapaj jahuapi quiquinpaj maqui cashca cachun. Quiquinpajlla cachun rurashca runapaj jahuapi quiquinpaj maqui cashca cachun.

¹⁸ Chaipimi, quiquinmantaca manataj anchurishun. Ñucanchijman quiquin causaita cushcahuanca quiquinpaj shutipimi mañashun.

¹⁹ ¡Mandaj Dioslla, tucuita mandaj Taita Dioslla, ñucanchijta mushujyachihuayari! Quiquinpaj ñahuihuan achijyachihuayari. Quishpirishcamari cashun.