SALMOS 8 - Dios Rimashca Shimicunami

SALMO 8 Mandaj Diospaj poderpish runata alli nishca canapish

Gat pueblopi rurashca tocanapi tocanata alli yachaj cantachichun, David rurashca Salmomi.

¹ Mandaj Dios, ñucanchij Jatun Dios. Tucui cai pachapimi cambaj shutitaca jatunyachishca cangui. Can jatun cashcataca jahua pachacunamanta jahuamanmi churashcangui.

² Canta p'iñajcunamanta ch'icanyachingapajca uchilla huahuacuna, chuchucuj huahuacuna cantashcahuanmi muyujta pircashcahuan shina sinchiyachingui. P'iñajcunata, c'ariyajcunata upallachingapajmi chashna rurangui.

³ Jahua pachata ricushpaca cambaj maquihuan rurashcatami ricuni. Lunata, luzerotapish can rurashcata ricushpami,

⁴ cashna nini: Runaca ¿imatagari? ¿Ima cajpitaj pai yuyailla canguiyari? Huañujlla runataca ¿ima cajpitaj ricuj shamunguiyari?

⁵ Ashallamantami angelcuna shinallatataj mana rurashcangui. Jatun nishca canata, alli nishca canatami coronata shina churachishcangui.

⁶ Cambaj maquihuan rurashcacunata mandachunmari churarcangui, tucuitamari paipaj chaqui ucupi churarcangui.

⁷ Ovejacunatapish, huagracunatapish, sacha animalcunatapish,

⁸ huairata purij pajarocunatapish, yacupi causaj animalcunatapish, yacupi causaj tucui ima shujtajtapishmi paipaj chaqui ucupi churarcangui.

⁹ Mandaj Dios, ñucanchij Jatun Dios. Tucui cai pachapimi cambaj shutitaca jatunyachishca cangui.