SALMOS 78 - Dios Rimashca Shimicunami

SALMO 78 Dios agllashcacunaca mana cazuj cajpipish, Diosca imatapish pajtachicujllami carca

Sumaj shimicunata Asaf quillcashcami.

¹ Ñucapajlla cajcuna, ñuca mandashcata uyaichij. Ñuca rimashca shimicunataca, cancunapaj rinrinta pascashpa uyaichij.

² Yuyachij shimicunahuanmi parlagrini. Ñaupa huatacunamanta pacalla tiyashcacunatami rimagrini.

³ Chaicunata uyashpami entendishcanchij. Ñucanchij ñaupa yayacuna parlashcatami, chashna uyashcanchij entendishcanchij.

⁴ Chaicunataca paicunapaj huahuacunamanca mana pacashpallami huillashun. Mandaj Diosca alabana cashcatapish, q'uipa huahua huahuacunamanca huillanami canchij. Pai tucuita rurai tucuj cashcatapish, mancharinacunata rurashcatapish huillanami canchij.

⁵ Taita Diosmi Jacobmanca, ima shina causanata yachachirca. Paimi israelmanca mandashcata curca. Chaitaca huahua huahuacunaman ñucanchij ñaupa yayacuna huillachunmi mandarca.

⁶ Q'uipa punllacuna huacharij huahua huahuacuna yachachunmi mandarca. Paicunapish ashtahuan q'uipa huahuacunaman huillachunmi chaitaca mandarca.

⁷ Taita Diospi paicunapaj shunguta churachunmi chashna mandarca. Taita Dios imallata rurashcata ama cungarishpa, pai mandashcacunatapish pajtachichunmi mandarca.

⁸ Cancunaca cancunapaj ñaupa yayacuna shina Diosta c'ariyaj, rumi shungucunaca ama canguichijchu. Paicuna shina shungutapish, yuyaitapish Diosmanta anchuchijcunaca ama canguichijchu.

⁹ Efraincunaca, puntajlla caspicunata arcohuan shitanata alli yachajcunami carca. Ashtahuanpish macanacui punllaca huashaman tigrajllacunami carca.

¹⁰ Paicunaca Taita Dioshuan ari ninacushcata cungarijllacunami carca. Pai mandashca shina mana purishun nijcunami carca.

¹¹ Ashtahuanpish pai imallata rurashcatapish cungarircacunami. Mancharinacunata ricuchishcatapish cungarircacunami.

¹² Taita Diosca Egiptopi caj Zoán pambapimi mancharinacunata rurarca. Paicunapaj ñaupa yayacunapaj ñaupajpimi chashna rurarca.

¹³ Mama cuchatami ishquipi chaupirca. Chaitami paicunataca ch'imbachirca. Yacutaca patacunata shinami rurarca.

¹⁴ Punllaca p'uyuhuan ñaupashpami pusharca. Tutaca ninahuan achijyachishpami pusharca.

¹⁵ Shitashca pambapipish peña urcutami chaupirca. Chaimanta yacuta llujshichishpami ubyachirca.

¹⁶ Chai peña urcumantami huajiyacuj yacuta llujshichirca. Jatun yacumari pambacunata callparca.

¹⁷ Chashna rurajpipish, paita p'iñachishpami cutinllataj juchallircacuna. Jahua pachapi caj Mandaj Diostami c'ariyarcacuna. Shitashca pambapimi chashna c'ariyarcacuna.

¹⁸ Diostaca paicuna munashcata rurachun nishpami p'iñachircacuna. Paicuna munashca micunatami mañarcacuna.

¹⁹ Taita Diostaca cashnami rimarcacuna: “¿Diosca cai shitashca pambapica, imata carai tucungachu imashi?

²⁰ Taita Diosca peña urcumanta yacuta llujshichishpa callpacuj jatun yacuta rurarcatajmari. Paipajlla cajcunamanca tandatapish ¿carai tucungachu imashi? ¿Aichatapish maimanta cui tucungachu imashi?” nishpami rimarcacuna.

²¹ Chaita uyashpami, Mandaj Diosca p'iñarirca. Jacobhuanca nina sindirij shinami p'iñarirca. Israelcunahuanca yallitajmi p'iñarirca.

²² Paicuna mana crishcamantami paica p'iñarirca. Pai quishpichij cashcapi shunguta mana churashcamantami chashna p'iñarirca.

²³ Shina cajpipish, p'uyutami jahuamanta cacharca. Jahua pacha pungucunatami pascarca.

²⁴ Maná shuti granotami paicuna micuchunca tamyachirca. Jahua pacha trigotami paicunamanca curca.

²⁵ Runacunaca angelcuna micunatami micurcacuna. Paicuna mana nijta micuchunmi Taita Diosca micunata cacharca.

²⁶ Inti llujshin ladomantami huairata cacharca. Pai tucuita rurai tucuj cashcahuanmi ura ladomantapish huairata apamurca.

²⁷ Paicunapaj jahuamanca ñutu allpata shinami aichataca tamyachirca. Huairata purij pajarocunatami mama cucha t'iyuta shina tamyachirca.

²⁸ Carpa huasicuna chaupipimi urmachirca. Paicuna causacun carpa huasicuna muyundijpimi urmachirca.

²⁹ Taita Dios paicuna munashcata pajtachijpica micurcacunami, sajsarcacunami.

³⁰ Aichata ña shimipi charicushpapish cashtushpa manaraj mishquichijpimi,

³¹ Mandaj Dios yallitaj p'iñarishca paicunapaj jahuaman shamurca. Paicunapuracunataca yallitaj c'ari c'aricunatami huañuchirca. Israelcunapuracunataca ashtahuan alli runacunatami urmachirca.

³² Chashna rurajpipish, cutin juchallircallacunami. Mancharinacunata Taita Dios rurashcataca yangapimi churarcacuna.

³³ Chaimantami paicunapaj causaitaca p'uyulta shinalla chingachirca. Paicunapaj causaitaca llaquihuanmi chingachirca.

³⁴ Chashna huañuchijpimi Taita Diostaca mashcarcacuna. Chaimi paitaca mana samashpalla mashcarcacuna.

³⁵ Paicuna miticunaca Taita Dios cashcatami yuyarircacuna. Paicunata quishpichijca jahua pachapi caj Taita Dios cashcatami yuyarircacuna.

³⁶ Shina cashpapish, sumajta rimaj tucushpa llullana yuyaillami carcacuna. Llulla c'allucunami carcacuna.

³⁷ Paipica manataj shunguta churarcacunachu. Paihuan ari ninacushcapipish mana sinchi catircacunachu.

³⁸ Ashtahuanpish paica llaquijmi carca. Paicuna millaita rurashcatapish perdonashpami mana chingachirca. Tauca cutin llaquichinalla p'iñarishpapish mana llaquichircachu. P'iñarishpa llaquichinatapish paica jarcarircami.

³⁹ Paicunaca huañujlla runacuna cashcatami yuyarirca. Samai shina chingarijlla cashcatami yuyarirca.

⁴⁰ Mashnatajshi cutinmi c'ariyarcacuna. Shitashca pambapimi c'ariyarcacuna. Imapish mana tiyan pambapimi paitaca p'iñachircacuna.

⁴¹ Cutin, cutinmi Taita Diostaca caita chaita rurachun nircacuna. Chashnami israelcunapaj Jucha illaj Diostaca p'iñachircacuna.

⁴² Llaquinayajta causacujpi shuj punlla paipaj maquihuan llujshichishcataca mana yuyarircacunachu.

⁴³ Milagrocunata Egiptopi rurashcacunatapish mana yuyarircacunachu. Mancharinacunata Zoanpi rurashcacunatapish mana yuyarircacunachu.

⁴⁴ Chaipica ama ubyai tucuchunmi callpacuj yacucunataca yahuarman tigrachirca.

⁴⁵ Israelcunata p'iñajcunapajmanca ima tiyajta micuchunmi p'iña chuspicunata cacharca. Chingachij sapocunatapishmi cacharca.

⁴⁶ Egipciocunapaj p'ucushca granocunataca oruga c'urucunamanmi curca. Paicunapaj trabajashca chagracunatapish langostacunamanmi curca.

⁴⁷ Paicunapaj uva chagracunataca, runduhuanmi tucuchirca. Higo chagratapish casahuanmi tucuchirca.

⁴⁸ Paicunapaj animalcunataca, runduhuanmi tucuchirca. Paicunapaj animalcunataca rayohuanmi chingachirca.

⁴⁹ Egipciocunapaj jahuamanca nina sindirij shina pai p'iñarishcatami cacharca. Yallitaj p'iñarishca llaquitami cacharca. Tucuchij huaranga huaranga angelcunatami cacharca.

⁵⁰ Pai p'iñarishpaca yallitaj llaquichinami tucurca. Paicunataca huañuimantaca manataj quishpichircachu. Ashtahuanpish huañuiman cushpatajmi alli carca.

⁵¹ Egipciocunapaj punta churicunataca tucuicunatami huañuchirca. Cam runapaj punta churicunataca paicunapaj carpa huasicunallapitajmi huañuchirca.

⁵² Ashtahuanpish Taita Diosca, paipaj cajcunataca ovejacunata shinami llujshichimurca. Canlla ovejata shinami shitashca pambata pushamurca.

⁵³ Alli cuidashpami ñaupamurca. Ima manchai illajlla cachunmi chashna pushamurca. Ashtahuanpish paicunata p'iñajcunataca mama cuchami millpurca.

⁵⁴ Chai q'uipaca paipajlla caj cai llajta lindemanmi chayachimurca. Paipaj alli maquihuan mishashca cai urcumanmi pushamurca.

⁵⁵ Llajtacunataca israelcunapaj ñaupajmantami llujshichishpa cacharca. Allpacunataca paicunapaj cachunmi cordelhuan p'itishpa curca. Paicuna causacushca huasicunapica Israel aillucunatami causachun churarca.

⁵⁶ Ashtahuanpish israelcunaca jahua pacha Taita Diostaca caita chaita rurai nishpami yallitaj p'iñachircacuna. Ima shina causachun pai yachachishcatapish mana huaquichircacunachu.

⁵⁷ Ashtahuanpish huashatami ricuchircacuna. Paicunapaj ñaupa yayacuna shinallatajmi c'ariyarcacuna. Pandaman shitaj arco shinami huishturircacuna.

⁵⁸ Lomacunapi altarcunata rurashpami p'iñachircacuna. Labrashpa rurashca dioscunahuanmi yallitaj p'iñachircacuna.

⁵⁹ Taita Diosca chaita uyashpami yallitaj p'iñarirca. Israelcunahuanca yallitajmi p'iñarirca.

⁶⁰ Chaimantami Silopi caj carpa huasipi canataca saquirca. Runacunapaj chaupipi pai causacushca carpa huasimantaca anchurcami.

⁶¹ Pai tucuita rurai tucuj cashcata ricuchijtaca prezu apachunmi curca. Sumaj cashcata ricuchijtapish p'iñajcunapaj maquipimi churarca.

⁶² Paipaj cajcunataca espadahuan huañuchichunmi curca. Paipaj cajcunahuanca yallitajmi p'iñarirca.

⁶³ Paicunapaj q'uipa huiñaicunataca ninami tucuchirca. C'arihuan manaraj chayarishcacuna cazarajpi cantanapish mana tiyarcachu.

⁶⁴ Paicunapaj curacunapish espadapimi huañurcacuna. Paicunapaj viuda huarmicunapish mana huacai tucurcacunachu.

⁶⁵ Chaipimi Jatun Diosca, dormicuj rijcharij shina jatarirca. C'ari c'ari runa vinohuan machashca shinami caparirirca.

⁶⁶ Paicunata p'iñajcunataca huashamantami chugrichirca. Paicunataca paicunapaj tucui causaipajmi pingachirca.

⁶⁷ Josepaj huahua huahuacunataca Efrainpaj aillucunatami mana agllashpa shitarca.

⁶⁸ Ashtahuanpish Judapaj aillutami agllarca. Pai c'uyashca Sión urcutami agllarca.

⁶⁹ Paipajlla huasitami shayachirca. Tucuita yalli jatuntami shayachirca. Cai pachata huiñaipaj sinchita churashca shinallatajmi churarca.

⁷⁰ Paipajta ruraj Davidtami agllarca. Canlla ovejacunapajmantami pushamurca.

⁷¹ Cunanlla huacharishca bachujcunapaj ladomantami apamurca. Pai agllashca Jacobpaj huahua huahuacunata michichunmi apamurca. Paipaj israelcunata michichunmi pushamurca.

⁷² Davidca tucui shunguhuanmi israelcunataca tucuipi alli pusharca. Paipaj sinchi maquihuanmi michirca.