SALMOS 77 - Dios Rimashca Shimicunami

SALMO 77 Taita Dios tucuita rurai tucuj cashcata alli yuyarinami

Tonota alli yachaj Jedutún cantachichun, Asaf rurashca Salmomi.

¹ Taita Diostaca ñuca shimihuanmi mañarcani. Taita Diostami mañarcani. Paica ñuca mañashcata uyahuangami.

² Ñuca llaquihuan cai punllapica, Jatun Diostami mashcarcani. Tutapish mana samarishpami maquicunata huichi chutashpa paitaca mañacurcani. Ñuca almapish mana cushicui tucurcachu.

³ Taita Diosmanta yuyarishpaca aij nircanimi. Ñuca espiritupish aij nicushpallami chahuata huañurca. Selah

⁴ Taita Dioslla, ñuca ñahuicuna huichcarichunllapish mana saquircanguichu. Llaquillami carcani, mana rimarcanichu.

⁵ Callari punllacunatami yuyarircani. Ñaupa huatacunatami yuyarircani.

⁶ Tutacuna ñuca cantacushcatami yuyarircani. Ñuca shungupi chaicunata yuyarishpami, ñuca yuyaillapi cashna tapurircani:

⁷ “Jatun Diosca ñucanchijtaca ¿huiñaitachu shitanga imashi? ¿Ña manatajchu ayudanga imashi?

⁸ ¿Pai llaquij canaca huiñaipajchu ña tucurirca imashi. Pai ñucanchijpaj rurasha nishcataca, ña manatajchu yuyaringa imashi?

⁹ Taita Diosca pai c'uyaj canatachu ¿cungarirca imashi? ¿Paipaj c'uyaj cashcataca p'iñarishpachu taparca imashi?” yuyarcanimi. Selah

¹⁰ Jahua pachapi caj Jatun Dios achca huatacunata paipaj alli maquihuan imalla allicunata rurashcata yuyarishpami, chai yuyaicunahuan ñucaca unguni.

¹¹ Mandaj Dios imallata rurashcatami yuyarisha. Ñaupa huatacunapi mancharinacunata quiquin rurashcatami ñucaca yuyarisha.

¹² Quiquin imallata rurashcacunataca yuyaricushallami. Quiquin imallata rurashcacunatami huillasha.

¹³ Taita Dioslla, quiquinpaj ñanca ima jucha illajllami. Pi shujtaj diostaj ñucanchij Dios shina jatunca tiyangari.

¹⁴ Taita Dioslla quiquinca mancharinacunata ruraj Diosmi cangui. Quiquin tucuita rurai tucuj cashcataca tucui llajtacunamanmi ricuchircangui.

¹⁵ Quiquinpaj cajcunataca quiquinpaj rigrahuanmari llujshichircangui. Jacobpaj, Josepaj huahuacunatamari chashna llujshichircangui. Selah

¹⁶ Taita Dioslla yacucunaca quiquintaca ricurcami. Yacucuna quiquinta ricushpaca mancharircacunami. Mama cucha ucujman caj yacucunapish chujchurcacunami.

¹⁷ P'uyupish yacu jundashpa tapajtami tamyarca. Jahua pachacunapish c'ulun nircami. Quiquinpaj rayocunapish urmarcami.

¹⁸ Quiquinpaj rimashcaca jatun acapanapimi c'ulun nishca uyarirca. Quiquinpaj relampacunapish tucui cai pachatami achijyachirca. Allpapish chujchushpami cuyurirca.

¹⁹ Mama cucha chaupitami quiquinpaj ñanta surcurcangui. Jatun yacu chaupitami quiquin purinata rurarcangui. Chaimi quiquinpaj chaqui sarushcatapish pi mana ricui tucurca.

²⁰ Quiquinpaj cajcunataca ovejacunata shinami pushamurcangui. Moisespaj, Aaronpaj maquihuanmi pushamurcangui.