SALMOS 75 - Dios Rimashca Shimicunami

SALMO 75 Diosca millaita rurajtaca llaquichinmi, cashcata rurajtaca jatun canapi churanmi

Ama llaquichihuaichu nishpa cantana tonopi, tonota alli yachaj cantachichun, Asaf rurashca Salmomi.

¹ Quiquintaca pagui ninchijmi. Taita Dioslla quiquintami pagui ninchij. Quiquinpaj shutica c'uchullapimi. Runacunaca jatun mancharinacunata quiquin rurashcatami huillancuna.

² Ñuca llaquichina punllapimi, paicuna imalla rurashcataca ricuchisha.

³ Allpaca paipi causajcunandijmi chujchungacuna. Chashna cajpipish allpapaj pilarcunataca ñucami sinchita charicuni. Selah

⁴ Ch'ahuancunataca: “Allimi cani ama” nirichijchu ninimi. Diosta mana rijsijcunataca: “Ama jatun tucuichijchu nircanimi.

⁵ Cancuna c'ari c'ari cashcallahuanca ama jatun tucuichijchu. Maipish cachun jatun tucushpa ama rimaichijchu” ninimi.

⁶ Jatunyachijca inti llujshin ladomantapish, inti huashicun ladomantapish mana shamunchu. Shitashca pambamantapish mana shamunchu.

⁷ Ashtahuanpish juezca Taita Diosmari. Paimi shujcunataca cumurichin. Caishujcunataca jatun canapi churan.

⁸ Copaca Mandaj Diospaj maquipimari. Vinoca tucuihuan chagrushca p'ucushcamari. Chai vinotaca paimi tallinga. Cai pachapi causaj Diosta mana rijsijcunami tucuringacama ubyangacuna.

⁹ Ashtahuanpish ñucaca Jacobpaj Taita Diosmantaca huillacushallami. Paitaca punllanta cantacushallami.

¹⁰ Juchayujcuna mandacuntaca chingachishami. Ashtahuanpish cashcata rurashpa mandajcunataca jatun canapimi churasha.