SALMOS 74 - Dios Rimashca Shimicunami

SALMO 74 Taita Dioslla p'iñajcuna llaquichichun ima nishpataj saquihuanguiyari nishcami

Sumaj shimicunata Asaf quillcashcami.

¹ Taita Dioslla, ¿imamantataj ñucanchijtaca huiñaipaj yanganchinguiyari? ¿Imamantataj quiquinpaj q'uihua pambacunapi purij ovejacunahuanca nina sindirij shina p'iñaringuiyari?

² Quiquinpaj cajcunataca yuyaripayari. Ñaupamanta quiquin munashcacunataca yuyaripayari. Quiquinpaj aillu cachunmari llaquimanta llujshichircangui. Quiquin causashca cai Sión urcutapish yuyariyari.

³ Manataj allichi tucuipaj cachun urmachishcata ricunaman shamuyari. Chai p'iñajcuna quiquinpaj huasita llaquichishcacunata ricuj shamuyari.

⁴ Quiquinta p'iñajcunaca cambajlla cajcunapaj chaupipimari caparirircacuna. Paicuna japishcata ricuchij banderacunatamari churarcacuna.

⁵ Paicunaca quichquijlla yuracuna chaupiman yuracunata urmachingapaj hachahuan yaicujcuna shinamari.

⁶ Chashna yaicushpami sumaj ricunacunata rurashca caspicunataca hachacunahuan, martillocunahuan p'aquishcacuna.

⁷ Quiquinpaj huasitaca, ninahuanmi rupachircacuna. Quiquinpaj shuti tiyacun carpa huasitapish pambapi shitashpami yanganchircacuna.

⁸ Paicunapaj shungupica: “Shuj cutintaj chingachichun” yuyarcacunami. Ñucapajlla cajcuna tandanacuna huasicunataca tucui llajtapimi rupachircacuna.

⁹ Quiquin ñucanchijhuan cashcata ricuchij señalcunataca ña mana ricunchijca. Quiquin huillachishcata huillajpish ña mana tiyanca. Maicama ñucanchij cashna canataca ñucanchijpurapica, pi mana yachanchu.

¹⁰ Taita Dioslla, ¿maicamataj ñucanchijta llaquichijcunaca ñucanchijtaca c'amicungallari? Quiquinta p'iñajcunaca ¿huiñaitachu quiquinpaj shutita p'iñashpa c'amicungalla imatagari?

¹¹ ¿Ima nishpataj quiquinpaj maquita tandanguiyari? ¿Ima nishpataj quiquinpaj alli maquita pecho ucupi pacanguiyari?

¹² Shina cashpapish Taita Dioslla, ñaupamantamari ñucapaj Jatun Mandaj cangui. Quiquinmari cai pachapi, quishpirinata ruraj Taita Dios cangui.

¹³ Quiquin tucuita rurai tucuj cashcahuanmari jatun cuchatapish chaupircangui. Yacupi causaj manchanana animalcunapaj umacunatapish ñuturcanguimari.

¹⁴ Leviatán nishca animalpaj umacunatapish llapircanguimari. Shitashca pambacunapi causaj animalcuna micuchunmari curcangui.

¹⁵ Pugyucunatapish, purij yacucunatapish quiquinmari llujshichircangui. Mana chaquiripaj jatun yacutapish chaquichircanguimari.

¹⁶ Punllapish quiquinpajmi tutapish quiquinpajllatajmi. Quiquinmi lunatapish intitapish churarcangui.

¹⁷ Quiquinmi tucui cai pacha maillata canata churarcangui. Usyatapish, tamyatapish quiquinmi rurarcangui.

¹⁸ Caitaca yuyariyari: Mandaj Dioslla, quiquinta p'iñajcunaca quiquintami c'ariyarcacuna. Yuyai illaj runacunaca quiquinpaj shutita p'iñashpamari c'amircacuna.

¹⁹ Quiquinpaj urpipaj causaitaca, millai animalcunaman ama cuhuaichu. Quiquinpaj huajchacunapaj causaitaca millaicuna chingachichun ama saquihuaichu.

²⁰ Ñucanchijhuan ari ninacushcata yuyariyari. Cai amsa pachapica millaita rurajcunallamari jundarishca.

²¹ Llaquita apacujtaca ama cutin pingachihuaichu. Llaquilla cajcunami, huajchacunami quiquinpaj shutitaca alabangacuna.

²² Jatariyari, Taita Dioslla. Quiquin tucuita rurai tucuj cashcataca ricuchiyari. Yuyai illaj runa punllanta quiquinta c'amicuchunllaca ama saquichu.

²³ Quiquinta p'iñajcuna capariricujtaca imata ruranata yuyariyari. Quiquinta p'iñajcuna huaica jatarishpa quiquinpajman uyarijta mana shaicushpa c'amicujtaca imatapish rurahuayari.