SALMOS 73 - Dios Rimashca Shimicunami

SALMO 73 LIBRO III (Salmos 73–89 ) Diosca millaicunataca llaquichingami

Asaf rurashca Salmomi.

¹ Taita Diosca israelcunahuanca allimari. Shungupi ima mapa illajlla cajcunahuanmi alli.

² Ñucaca cazimari lluchcarini. Ashallamantamari ñuca chaquicunaca mana lluchcarin.

³ Jatun tucushcacunata ricushpamari paicuna shina canata munarcani. Diosta mana rijsijcuna achcata charijyajta ricushpamari paicuna shina canata munarcani.

⁴ Paicunaca huañui japinatapish mana manchancunachu. Paicunaca fuerza sapacunamari.

⁵ Caishuj huañujllacuna shinapish ima llaquita mana apancunachu. Shujtajcunata shina azotishcapish mana cancunachu.

⁶ Paicunamanca jatun tucunami coronata churachin. Millaita ruranahuanmi churarin.

⁷ Ñahuicuna llujshirijtami huirayancuna. Paicunapaj millaita yuyashcaca shungumantaca talliricunmi.

⁸ Chanzatamari rurancuna. Jatunta llaquichina yuyaillamari rimancuna. Jatun tucushpami rimancuna.

⁹ Paipaj shimihuanca jahua pachata p'iñashpa c'aminllami. Paipaj c'alluhuanca cai pachapimi munashcata rimarishpa purin.

¹⁰ Chaimi Diosca pai agllashcacunataca paicunapajman tigrachun saquin. Chaimantami paicunaca yallitaj yacuta ubyaj shina millai yuyai junda tucuncuna.

¹¹ Millaicunaca: “¿Taita Diosca ima shinataj yachangari? Jahua pachapi causaj Taita Diosca caitaca ¿yachangachari?” nincunami.

¹² Chai millaicunata ricuichigari. Paicunaca imapish mana tucushpami achcata charijyancuna.

¹³ Alli yuyarijpica, ñuca shungutaca yangallami chuyayachishcani. Ñuca maquicunata mana mapayachishcapish yangallami.

¹⁴ Ashtahuanpish punllantamari azotishca cashcani. Tucui tutamantacunamari macashca cashcani.

¹⁵ Ñucapish paicuna shinallataj rimashpaca, quiquin agllashcacunapaj huahua huahuacunataca umaimanmari.

¹⁶ Chaicuna ima shina cashcata ñuca entendisha nishpa yuyarijpica ñucapajca yallitaj sinchimari carca.

¹⁷ Taita Diospaj huasiman yaicushpallami, tucuripi paicuna ima shina cana cashcataca yacharcani.

¹⁸ Paicunataca lluchcarinapimi churashcangui. Paicuna llaqui tucunallapitaj chingarichunmi shitashcangui.

¹⁹ Paicunataca cungaillapimi chingachinga. Jatun manchaihuanmi ñapish tucuchinga.

²⁰ Muscucushpa rijcharijpi chai muscucushca rijcharijpi chingarij shinallami, Jatun Dios jatarijpica millaicunaca chingaringacuna.

²¹ Ñuca alma jatunta llaquirijpica, ñuca shunguca t'ujyacuj shinami tucurca.

²² Ñucaca imata mana entendij ch'ahuanmi carcani. Quiquinpaj ñaupajpica shuj animal shinamari carcani.

²³ Shina cashpapish, ñucaca punllantami quiquinhuan carcani. Quiquinmari ñuca alli maquimanta pushahuarcangui.

²⁴ Ñucataca quiquin cunashcahuanmari pushahuarcangui. Q'uipataca quiquin sumaj cashcapimari chasquihuangui.

²⁵ Jahua pachapica, pi shujtajta mana charinichu, quiquinllatamari charini. Cai pachapipish, quiquinmanta ch'ican ima shujtajtaca mana charisha ninichu.

²⁶ Ñuca aichapish ñuca shungupish urmarinmari. Shina cajpipish ñuca shungu samarina rumica Jatun Diosmari. Huiñaipaj ñuca charinaca Jatun Diosmari.

²⁷ Quiquinmanta caruyajcunaca chingaringatajmi. Quiquinmanta ch'icanyajcunataca tucuicunata tucuchinguitajmi.

²⁸ Ñucapajca, Taita Diospaj c'uchupi canami alli. Tucui pai imalla rurashcacunata huillangapajmi Mandaj Jatun Diospi ñuca shunguta churarcani.