SALMOS 70 - Dios Rimashca Shimicunami

SALMO 70 Llaquimanta quishpichichun rogashcami

Tonota alli yachaj cantachichun, David rurashca Salmomi. Taita Dios imalla rurashcata yuyarinapaj cachun rurashca Salmomi.

¹ Taita Dios, ñucata quishpichinaman shamuyari. Taita Dios ñucata ayudanaman utca shamuyari.

² Ñucata huañuchingapaj mashcacujcunaca pingaichishca cachun. Muspachishca cachun. Ñucata llaquichinata munacujcunaca huashaman tigrashca cachun. Pingaichishca cachun.

³ Ñucata chanzata rurajcunaca huashaman tigrachishca cachun. Paicunallataj chanzata rurajcuna cashcamanta pingaichishca cachun.

⁴ ¡Quiquinta mashcaj tucuicunaca cushicuchun. Quiquinpi cushicuchun! Quiquin quishpichinata c'uyajcunaca tucui causaipi: “Taita Diosca yallitaj jatunyachishca cachun” nichun.

⁵ Ñucaca llaquichishcami cani. Ñucaca ima illajmi cani. Taita Dioslla, ñucapajman utca shamuyari. Quiquinca ñucata ayudajmi cangui. Ñucata quishpichijmi cangui. Mandaj Dios ama uniyaichu.