SALMOS 7 - Dios Rimashca Shimicunami

SALMO 7 Mitsahuai nishpa Mandaj Diosta mañashcami

Benjaminpaj churi Cus runa c'amijpi David llaquijlla cashpa Mandaj Diosta cantashca Salmomi.

¹ Ñucata Mandaj Dioslla, canpimi shunguta churarcani. Ñucata llaquichina yuyailla cajcunamanta quishpichishpa cacharihuayari.

² Can mana mitsajpica paicuna ñucata japishpaca, león shinamari mirga mirgata p'itingacuna. Pi mana mitsaj tiyajpica paicunapaj munaitamari ñutungacuna.

³ Mandaj Dios, ñuca Dioslla ima millaitashi rurashcani. Ñuca maquihuanchu ima millaita rurarcani imashi.

⁴ Ñucahuan alli caj ñucapaj allita ruraj runatachu mana allihuan cutichircani imatagari. Ashtahuanpish ñucata yangamanta p'iñajtapish llaquimanta llujshichircanimari.

⁵ Ñuca millai cashca cajpica, llaquichina yuyailla caj ñucata p'iñaj llaquichichun saquilla. Ñuca causaitaca allpapi sarushpa ñutuchun saquilla. Ñuca alli nishca canatapish ñutu allpapi chingachichun saquilla. Selah

⁶ Ñucata Mandaj Dioslla, can p'iñarishcahuan shayariyari. Ñucata p'iñajcunapaj ñaupajpi can ch'imbapura shayariyari. Cashcata rurashpa ricuchinata can mandashcataca rijchachishpa can quiquintaj ñucapaj randi ricuchiyari.

⁷ Tucui llajtacunami cambaj muyundijpi tandanacunga. Paicunataca jahua pachapi tiyarishpami mandangui.

⁸ Llajtacunapi causajcuna imalla rurashcataca Mandaj Diosmi ricuchinga. Mandaj Dioslla, cashcata ñuca rurashcatapish chai shinallataj ricuchihuayari. Ima pandata ñuca mana rurashcatapish chai shinallataj ricuchihuayari.

⁹ Diosca cashcata ruraj cashcamanta shungutapish yuyaitapish yachajmi cangui. Millaicunapaj juchacunataca tucuchiyari. Cashcata rurajtaca sinchita shayachiyari.

¹⁰ Ñuca escudoca Jatun Diospimi. Paica cashcata rurajcunata quishpichijmi.

¹¹ Diosca cashcata ruraj Juezmi. Diosca paita mana manchajcunataca punllanta p'iñacunllami.

¹² Manataj cutirijpica paipaj espadata filojllata rurangami. Paipaj arcotapish allichishpa caspita shitanallatami charicun.

¹³ Huañuchinacunatapish allichishcatami charicun. Flechacunatapish puca nicujta rupachishcatami charicun.

¹⁴ Diosta mana manchajcunaca millaitamari chichushca, paicunaca juchatamari chichushca, umaj cashcaca huacharigrinmari.

¹⁵ Jatun jutcutamari allashca. Pai allashca jutcullapitajmari huashicunga.

¹⁶ Pai millaita rurashcaca, paipaj jahuallamantajmi tigranga. Llaquichinata pai yuyashcapish, paipaj umallapitajmi urmanga.

¹⁷ Mandaj Diostaca pai ima shina cashcata rurashca shinallatajmi alabasha. Jahua pachapi caj Mandaj Diospaj shutitaca cantashami.