SALMOS 65 - Dios Rimashca Shimicunami

SALMO 65 Taita Diosca pai rurashcacunapimi yallitaj cuj cashcahuan junda cashcata ricuchin

Tonota alli yachaj cantachichun, David rurashca Salmomi.

¹ Taita Dios Sionpi alabanaca quiquinpajmi. Quiquinman cuna tucushcacunatapish pajtachingami.

² Quiquinca mañashcata uyanguimi. Tucuicunami quiquinpajmanca shamungacuna.

³ Millaita rurashcacunami ñucataca llapicun. Chashna cajpipish quiquinca ñucanchij c'ariyashcacunataca perdonanguimi.

⁴ Maijanpish quiquin agllashcaca cushichishcami. Quiquin pushamushcaca cushichishcami. Quiquinpaj huasi canllacunapi causachunmi pushamushcangui. Quiquinpaj huasipi tiyaj allicunahuanmari cushicushun. Jucha illaj quiquinpaj huasipimari cushicushun.

⁵ Quiquin cashcata ruraj cashcahuanca jatun allicunata rurashpami ñucanchijmanca cutichingui. Taita Dios ñucanchijta quishpichijmari cangui. Tucui cai pachapi causajcuna shuyanami cangui. Mama cucha tucuri caru llajtacunapi causajcunapish shuyanami cangui.

⁶ Quiquinca urcucunata sinchita churajmi cangui. Quiquinpaj tucuita rurai tucuj cashcahuanmi chashna rurangui. C'ari c'ari canahuan chumbillirishcami cangui.

⁷ Mama cucha huajiacujtapish parachijmi cangui. Mama cucha yacu jatarishpa huajiacujtapish, casijllata rurajmi cangui. Llajtacuna bullanacucujtapish upallachijmi cangui.

⁸ Chaimi tucui cai pachapi causajcunaca mancharinacunata quiquin rurajta ricushpaca mancharincuna. Tutamanta, pacaricujtapish quiquinmari cushichingui. Chishi, chishiyacujtapish quiquinmari cushichingui.

⁹ Allpataca ricuj shamunguimi. Allpapica tamyachinguimi. Yallitaj charijtami rurangui. Taita Dios quiquinpaj jatun yacuhuan, yacucuna jundahuanmi granocunataca p'ucuchingui. Chashnami chagracunataca p'ucuchingui.

¹⁰ Yapushca rahuacuna chingarijtami tamyachingui. Larcacunata yacu callpajtami tamyachingui. Tamyachishpami sinchi p'ulucunatapish nuyuchingui. Chashnami muyutaca huiñachingui.

¹¹ Quiquinpaj tucui laya allicunahuanmi huatataca c'uchuyachingui. Quiquinpaj p'uyucunapish achcatami shullayachin.

¹² Shitashca pambacunapi michinacunatapish shullayachinmi. Lomacunaca cushicunahuanmi chumbillirin.

¹³ Pambacunaca canlla animalcuna jundami. Pugru pambacunaca granocunahuan jundami. ¡Cushijllatami caparincuna. Cushijllatami cantancuna!