SALMOS 64 - Dios Rimashca Shimicunami

SALMO 64 P'iñajcuna llaquichingapaj huashalla yuyaricujpi, Taita Dios huaquichichun mañashcami

Tonota alli yachaj cantachichun, David rurashca Salmomi.

¹ Taita Dios ñuca huillashcata uyahuai. Ñucata p'iñaj huañuchisha nicunmanta ñucata huaquichihuai.

² Millaicuna llaquichingapaj huashalla yuyarinacucunmanta pacahuai. Llaquichingapaj huashalla yuyarinacucuj yallitaj millaicunamanta pacahuai.

³ Paipaj c'allutaca espadata shinami filojllata ruran. Puntajlla caspita shitaj shinami millai shimita riman.

⁴ Ima pandata mana rurajta pacalla llaquichingapajmi chashna ruran. Mana manchashpami cungaimanta llaquichincuna.

⁵ Millaita rurana yuyailla tucushpa pacallapi trampata churashpami: “Caitaca pi mana ricungachu” nincuna.

⁶ Mana allicunata ruranallatami yuyarincuna. Millaita rurashca alli llujshichunmi alli, alli yuyarincuna. Paicunapaj shungu, paicunapaj yuyaica tucuicunapajmi ucujta jutcu shina.

⁷ Ashtahuanpish paicunataca Taita Diosmari puntajlla caspihuan llaquichinga. Llaquicunaca paicunapajmanca ñapish shamungallami.

⁸ Quiquin c'allullatajmi llaquipi churanga. Chaita ricujcunaca tucuicunami mancharingacuna.

⁹ Chaimantaca tucuicunami mancharingacuna. Taita Dios imallata rurashcatami huillangacuna. Chaipimi pai imallata rurashcata entendingacuna.

¹⁰ Cashcata ruraj runaca, Mandaj Dioshuanmari cushicunga. Paillapimari shunguta churanga. Alli shungucunaca tucuicunami jatunta cushicunga.