SALMOS 63 - Dios Rimashca Shimicunami

SALMO 63 Ñucaca Taita Diospimi samarini

Judá llajta shitashca urcupi cashpa David quillcashca Salmomi.

¹ Taita Dios quiquinca ñuca Diosmari cangui. Tutamanta utcatami quiquintaca mashcasha. Ñuca almaca quiquintami yacunachin. Ñuca aichaca quiquintami munanachin. Chaquishca, tullu allpapimari puricuni. Yacu illanpimari puricuni.

² Quiquin tucuita rurai tucuj cashcata, quiquin sumaj cashcata Diospajlla huasipi ricushca shinallataj ricungapajmi mashcacuni.

³ Quiquinpaj c'uyaica causaitapish yallimari. Ñuca shimica quiquintami alabanga.

⁴ Ñuca causaipica quiquintaca chashnami alli nisha. Quiquinpaj shutipimi, ñuca maquicunata alzasha.

⁵ Ñuca shimica quiquintaca caparishpami alabanga. Chaihuanca ñutcuta, huira aichata micushca shinami ñuca almaca cushicunga.

⁶ Camapi ñuca cashpapish quiquintami yuyarisha. Tutacunapi cuidashpa pacaricushpapish quiquintami yuyarisha.

⁷ Quiquinca ñucata ayudajmi cangui. Chaimantami quiquinpaj alascuna llandupi cushicusha.

⁸ Ñuca almaca quiquinpi llutarishca shinami. Quiquinpaj alli lado maquimi ñucataca charirahuan.

⁹ Ñucata huañuchingapaj mashcajcunaca, allpa ucu jutcucunamanmi urmangacuna.

¹⁰ Paicunaca espadapimi huañungacuna. Chacalcuna micunami cangacuna.

¹¹ Ashtahuanpish jatun mandajca Taita Diospimi cushicunga. Paipaj shutipi imatapish nijca alabashcami canga. Llullata rimajcunapaj shimicunaca huichcashcami canga.