SALMOS 62 - Dios Rimashca Shimicunami

SALMO 62 Taita Diosllapimi paca tucuna

Tonota alli yachaj Jedutún cantachichun, David rurashca Salmomi.

¹ Ñuca almaca Taita Diosllapimi samarin. Ñuca quishpirinaca Taita Diosmantami shamun.

² Ñuca jatun rumica paillamari. Ñucata quishpichijca paillamari. Paica ñuca paca tucunamari. Ñucaca lluchcarishpapish mana urmashachu.

³ ¿Maicamataj shuj runata llaquichingapaj tandanacushpa jataringuichigari? Llapina yuyaillamari tandanacunguichij. Huishtu pata, urmanalla pirca urmaj shinamari llapina yuyailla puricunguichij.

⁴ Jatun canamanta urmachingapajllami tandanacushpa jatarincuna. Llullatami c'uyancuna. Shimihuanca allimi cangui nijtucuncunami. Ashtahuanpish shungupica, llaqui tucushca canman nincunami. Selah

⁵ Ñuca almaca Taita Diosllapimi samarin. Pai yuyailla canaca Taita Diosmantami shamun.

⁶ Ñuca jatun rumica paillamari. Ñucata quishpichijca paillamari. Paica ñuca miticunami mana lluchcarishachu.

⁷ Ñuca quishpirinaca Taita Diospimi. Ñuca jatunyanaca Taita Diospimi. Ñuca paca tucuna sinchi rumica Taita Diospimi. Ñuca miticunaca Taita Diospimi.

⁸ Gentecuna, paillapi shunguta churaichigari. Tucui causaipi paillata shuyaichigari. Tucui shunguhuan paipaj ñaupajpi mañaichigari. Taita Diosca ñucanchij paca tucunamari. Selah

⁹ Alli yuyarijpica huañujlla runacunaca huaira shinallami. Charijcuna cashpapish mana charishca shinallatajmi. Ishquindijtataj balanzapi pizajpica chai shinallatajmi.

¹⁰ Llaquichinacuillapica ama shunguta churaichu. Shuhuashcallapica ama yanga jatun tucuichu. Charinacunata jahuanpi jahuanpi mirachishpapish ama chaipi shunguta churaichu.

¹¹ Shuj cutinca Taita Diosca rimarcami: Ishqui cutinca cashna nijtami uyarcani: “Tucuita rurai tucuj canaca Taita Diospajmi.

¹² Llaquij canapish, Jatun Dios quiquinpajmari. Quiquinmari tucuicunaman japina cashcataca cungui. Ima shina rurashca shinatajmi cungui” nircami.