SALMOS 61 - Dios Rimashca Shimicunami

SALMO 61 Taita Dios huaquichina cashcapi shunguta churashcami

Tocanacunapi tocashpa tonota alli yachaj cantachichun, David rurashca Salmomi.

¹ Taita Dios, ñuca caparishcata uyahuai. Ñuca mañashcata uyahuai.

² Cai pacha tucurimantami quiquintaca caparisha. Ñuca shungu shaicurijpimi caparisha. Ñucata yalli ashtahuan jatun rumiman pushahuayari.

³ Quiquinca ñuca paca tucunami carcangui. Ñucata p'iñajpaj ñaupajpica sinchi torremi carcangui.

⁴ Ñucaca quiquinpaj carpa huasipimi causacushalla. Quiquinpaj alas ucupica imata mana manchashachu. Selah

⁵ Taita Dios quiquinman ñuca imallata cuna tucushcacunataca uyarcanguimi. Ñucamanca quiquinpaj shutita manchajcuna japina cashcatami cushcangui.

⁶ Jatun mandajmanca uni causaita mirachingui. Paipaj huatacunataca huahua huahuata shina mirachingui.

⁷ Taita Diospaj ñaupajpica huiñaitami mandanga. Quiquinpaj llaquij canahuan, mana llullahuan huaquichi.

⁸ Chaimi quiquinpaj shutitaca cantacushalla. Ñuca imalla cuna tucushcacunatapish punllantami cucushalla.