SALMOS 60 - Dios Rimashca Shimicunami

SALMO 60 P'iñajcunata mishangapaj ayudachun Taita Diosta mañashcami

Lirio sisacuna nishca cantota, tonota alli yachaj cantachichun quillcashcami. Aram-Naharaim mandajhuanpish, Soba llajtata mandaj Aramhuanpish David macanacushca q'uipa, Joab tigrashpa cachisapa pugru pambapi 12.000 edomitacunata huañuchishca q'uipa, ima shina mishashcata yachachingapaj sumaj shimicunata David quillcashcami.

¹ Quiquin Taita Dioslla ñucanchijta shitashcanguimi. Ñucanchijtaca llaquichinguimi. Yallitajmi p'iñarishcangui. Ñucanchijpajman tigrariyari.

² Allpata chujchuchinguimi. Chijtarijtamari chujchuchingui. Ashtahuanmari chujchucun. Chijtarishcacunataca allichihuayari.

³ Quiquin agllashcacunataca sinchi llaquicunahuanmi quiquinpajta rurarcangui. Muspachij vinotamari ubyachircangui.

⁴ Quiquinta manchajcunamanca banderatami curcangui. Mana llullamanta shayarichunmi curcangui. Selah

⁵ Quiquin c'uyashcacuna quishpirichun ñuca mañashcata uyahuayari. Quiquinpaj alli lado maquihuan quishpichiyari.

⁶ Taita Diosca paipajlla ucupica cashnami nirca: “Ñucaca cushicushami. Siquem llajtataca chaupishami. Sucot pugru pambataca medishami.

⁷ Galaad llajtaca ñucapajmi. Manasés llajtaca ñucapajmi. Efraín llajtaca ñuca umata pacajmi. Judaca ñuca mandana varami.

⁸ Moab llajtaca ñuca maillarina bateami. Edom llajtapica ñuca pargatetami shitasha. Filisteaca ñuca mishashpa cushicunami canga” nircami.

⁹ Muyundij sinchi pircayuj pueblomanca ¿pitaj pushangari? Edom llajtacamaca ¿pitaj pushangari?

¹⁰ ¿Ñucanchijta shitaj Taita Diostaj shina cangui? ¿Manachu ñucanchij soldadocunahuan llujshij cangui?

¹¹ P'iñajcunata mishangapaj ayudahuai. Gentecunapaj ayudaca yangallami.

¹² Taita Dioshuanca mancharinacunatami rurashun. Ñucanchijta p'iñajcunataca paimari sarunga.