SALMOS 6 - Dios Rimashca Shimicunami

SALMO 6 Llaquihuan cai punllacunapi cashpa llaquichun Diosta mañashcami

Tocanapi alli yachaj cantachichun, David rurashca Salmomi.

¹ Mandaj Dioslla, p'iñarishca cashpaca ama sinchita rimahuaichu. Yallitaj p'iñarishca cashpapish ama llaquichihuaichu.

² Ñucaca ungushcamari cani, Mandaj Dioslla ñucata llaquihuayari. Mandaj Dioslla ñucata alliyachihuayari, ñuca tullucunaca dijdijnicunmari.

³ Ñuca almapish musparishcamari cani. Mandaj Dioslla, ¿maicamataj chashnalla casha?

⁴ Mandaj Dioslla, ñucata quishpichinaman tigramuyari. Cambaj c'uyaihuan quishpichihuayari.

⁵ Huañushca cajca pi mana canta yuyarinchu. Pambashca cashpaca ¿pitaj cantaca alabangari?

⁶ Tucui tutacunami ñuca sauna shutujyajta huacani. Ñuca camapipish ñuca huiquita jichacunillami. Huacana fuerzapish ña mana tiyanchu.

⁷ Ñucata p'iñajcuna llaquichijpi huacacujllapica ñuca ñahuipish ungüi tucunmi. Ñuca ñahuipish maucayanmi.

⁸ Ñuca huacashcataca, Mandaj Diosca ñami uyahuashca. Millaita rurajcuna ñucamanta anchuichij.

⁹ Ñuca rogashcataca Mandaj Diosca uyashcami. Ñuca mañashcataca, Mandaj Diosca chasquishcami.

¹⁰ Ñucata p'iñajcunaca tucuicuna pingai tucushpami achcata musparingacuna. Ñahui quinllaillapimi pingai tucushpa callpangacuna.