SALMOS 58 - Dios Rimashca Shimicunami

SALMO 58 Millaicunata llaquichichun Taita Diosta mañashcami

Ama llaquichihuaichu nishpa cantana tonopi, tonota alli yachaj cantachichun, sumaj shimicunata David quillcashcami.

¹ Mandajcuna ¿mana llulla, cashcatatajchu rimacunguichij? Huañujlla runacuna ¿ñahuita ricushpallachu mandacunguichij?

² Ashtahuanpish cancunapaj shungupica millaita ruranallatami yuyaricunguichijlla. Cancunapaj maquihuan llaquichinacushcacunapish allpapica llashacunmi.

³ Diosta mana rijsijcunaca, mamapaj huijsamanta pachami Taita Diosmanta anchurircacuna. Huacharipachamantami llullata rimashpa, ñanmanta anchurircacuna.

⁴ Venenotami charincuna. Culebrapaj veneno shinatami charincuna. Mana uyaj culebra paipaj rinrinta huichcashpa mana uyaj shinami mana uyancuna.

⁵ Muspachinata alli yachaj yumbu tocajpipish, rinrin huichcashca culebraca mana uyanchu. Ch'ahuancunapish chai shinallatajmi.

⁶ Taita Dios paicunapaj quirucunataca p'aquiyari. Mandaj Dios, leoncunapaj cashtuna quirucunataca p'aquiyari.

⁷ Callpacuj yacucuna ñapish chingarishca shina cachun. Puntajlla caspicunahuan paicuna shitajpipish, mirga mirgapi p'aquirishca cachun.

⁸ Paicunaca churu shina tucurishca cachun. Huañushca huacharij huahua intita mana ricuj shina paicunaca cachun.

⁹ Casha lunyacuj mangata manaraj cunujyachishpa chingarij shina chingarichun. C'ari c'ari tucushcacunataca causajraj cajpi jatun acapanahuan chingachishca cachun.

¹⁰ Cashcata rurajca millaicunata Taita Dios llaquichijpica cushicungami. Paipaj chaquicunataca Diosta mana rijsijpaj yahuarpimi maillanga.

¹¹ Chaimi gentecunaca: “Cashcata rurajpajca japinaca tiyashcatajmi. Cai pachapi imalla rurashcacunata ricuchij Taita Diosca tiyashcatajmi” ningacuna.