SALMOS 57 - Dios Rimashca Shimicunami

SALMO 57 Catirashpa llaquichicujcunamanta quishpichichun mañashcami

Ama llaquichichun nishpa tonota alli yachaj cantachichun quillcashcami. Saulpaj ñaupajmanta miticushpa shuj jutcupi causacushpa sumaj shimicunata David quillcashcami.

¹ Taita Dios ñucata llaquihuayari. Ñucata llaquihuayari. Ñuca almaca quiquinpimari shunguta churan. Quiquinpaj alas llandupimi miticusha. Llaquicuna tucuringacamami miticusha.

² Jahua pacha Taita Diostami caparisha. Ñucata ayudaj Taita Diostami caparisha.

³ Taita Diosca jahua pachamanta cachashpami ñucataca quishpichinga. Ñucata yanganchishpa juchachicujcunamantaca quishpichingami. Taita Diosca llaquijmi, mana llullajmi. Selah

⁴ Ñuca causaica leoncunapaj chaupipimari. Lunyacuj ninata shimiman shitacujcunapaj chaupipimari siricuni. Paicunapaj quirucunaca lanzacuna shina, puntajlla caspicuna shinami. Paicunapaj c'alluca filosapa espada shinami.

⁵ Taita Dios quiquin tucuita rurai tucuj cashcaca, jahua pachacunapi junda cachun. Quiquinpaj sumaj cashcaca, tucui cai pachapi cashca cachun.

⁶ Ñuca chaquicuna churarichunca linchitamari churashcacuna. Ñuca almataca llaquichincunamari. Ñuca ñaupajpica jatun jutcutamari allashcacuna. Chaipica paicunallatajmari urmashcacuna. Selah

⁷ Taita Dios, ñuca shunguca quiquinta cantanajllamari. Ñuca shunguca Salmocunata cantanajllamari.

⁸ ¡Ñuca almalla rijchariyari! ¡Salterio rijchariyari. Arpa rijchariyari! Tutamantaca utcatami jatarisha.

⁹ Jatun Dios, quiquintaca gentecunapaj chaupipimi alabasha. Llajtacunapaj chaupipimi quiquintaca cantasha.

¹⁰ Quiquin llaquij cashcaca jahua pachacunacamami. Quiquinpaj mana llullaca p'uyucamami.

¹¹ ¡Taita Dios quiquin tucuita rurai tucuj cashcaca, jahua pachacunapi junda cachun! ¡Quiquinpaj sumaj cashcaca tucui cai pachapi cashca cachun!