SALMOS 55 - Dios Rimashca Shimicunami

SALMO 55 Alli apanacuj tucushpa llaquichijcunata tucuchichun Taita Diosta mañashcami

Tocanacunapi tocashpa, tonota alli yachaj cantachichun sumaj shimicunata David quillcashcami.

¹ Taita Dioslla, ñuca mañashcata uyahuai. Ñuca rogaricujpica, ama paca tucuhuaichu.

² Uyahuayari, cutichihuayari. Llaquihuan cashpamari tucui yuyaihuan caparishpa mañani.

³ Ñucata p'iñaj rimajpi, Diosta mana rijsij llaquichijpimari mañapani. Millaita rurashcacunataca ñucamanmari apachishca. Huañuchina yuyaihuanmari catirancuna.

⁴ Ñuca shunguca nanaihuanmari. Huañuna manchaimari ñucataca japishca.

⁵ Manchaihuan cana, chujchuihuan canamari ñuca jahuaman shamushca. Yallitaj manchaimari ñucataca pilluchishca.

⁶ Chaimi ñucaca: “¡Palomapaj alasta shina maijan ñucaman cujpica, jatarishpa rishpami maipi samarigriman!

⁷ Mai carumanchari miticushpa riman. Shitashca pambapichari causaiman. Selah

⁸ Jatun acapana shina, yallitaj huairandij tamya shina caticujcunamantaca utcachari miticuiman” ninimi.

⁹ Jatun Dioslla, chingachihuayari. Paicunapaj rimaicunataca ch'ican ch'icanta rurayari. Pueblopica llaquichinacui, c'aminacuillatami ricuni.

¹⁰ Paicunapaj muyundij pirca jahuapica tutai punllami, chapashpa muyuncuna. Chai pueblopica yallitaj millai, maita mana causaipaj llaquimi tiyan.

¹¹ Millaita ruranami paicunapaj chaupipica tiyan. Umana, shujtajcunata llaquichinaca paicunapaj plazacunapica mana illanchu.

¹² Ñucataca manapish p'iñajmari llaquichicun. P'iñaj runa llaquichicujpica, llaquita apaimanllami. Ñucata mana ricunachij llaquichingapaj jatarishca cajpica, paimantaca miticuimanllami.

¹³ Ashtahuanpish ricuipica can ñucahuan alli apanacujllataj, ñucahuan ishqui purijllataj, ñuca huasi ucupurallataj,

¹⁴ pi mana yachaipaj cashcatapish sumajta ishquilla parlanacujllataj, Taita Diospaj huasipipish ñucahuan tandalla sumajta purijllatajmari llaquichicungui.

¹⁵ Paicunapaj huasicunapi, paicunapaj chaupipica millaimi junda. Paicunataca huañuica cungaimanta japishca cachun. Seolmanca causajraj uriyachuncuna.

¹⁶ Ashtahuanpish ñucaca, Taita Diostamari caparisha. Mandaj Diosmari ñucataca quishpichinga.

¹⁷ Chishipish, tutamantapish, chaupi punllapish, mañashami, caparishami. Paica ñuca caparishcata uyangami.

¹⁸ Ñucata p'iñajcunahuan macanacuipica paimari sumaj causaihuan quishpichinga. Ñucata p'iñajcuna achcacuna cajpipish paimari quishpichinga.

¹⁹ Ñaupa punllacunamanta huiñaicama causacuj Taita Diosca uyashpa paicunataca utcami llaquichinga. Paicunallataj Taita Diosman mana cutirishcamanta, paita mana manchashcamantami chashna ruranga. Selah

²⁰ Millai runaca, paillahuantaj sumajta causacujcunata llaquichingapajmi paipaj maquita chutan. Ari ninacushcatapish p'aquinmi.

²¹ Pai rimashcacunaca mantequilla shina sumaj cashpapish, paipaj shungupica macanacuna yuyaillami tiyan. Rimashcacunaca aceitetapish yalli sumajtami nuyuchin. Ashtahuanpish paica lluchulla espada shinami.

²² Cambaj llaquitaca, Mandaj Diosman apachi. Paica canta charirangami. Cashcata rurajtaca, llaquita apacuchunllaca mana saquingachu.

²³ Taita Dioslla, paicunataca chingarinapaj caj jutcuman shitangui. Huañuchijcuna, umajcunaca paicunapaj chaupi causaillamanpish mana chayangacunachu. Ashtahuanpish ñucaca quiquinpimari shunguta churani.