SALMOS 53 - Dios Rimashca Shimicunami

SALMO 53 Gentecuna yuyai illaj cashcapish, millai cashcapish

Tonota alli yachaj llaquijlla tonopi cantachichun sumaj shimicunata David quillcashcami.

¹ Rumi shunguca paipaj yuyaipica Taita Diosca mana tiyanchu ninmi. Tucuicunami yallitaj millai tucushcacuna. Millanana millaita rurajcunami tucushcacuna. Allita rurajca pi mana tiyanchu.

² Taita Diosca huañujlla runacunapurapica, Taita Diosta mashcaj, alli entendij shujllapish tiyashcata ricungapajmi jahua pachamanta ricurca.

³ Tucuicunami huashaman tigrashcacuna. Tucuicunami yallitaj millaicuna tucushcacuna. Allita rurajca pi mana tiyanchu, shujllapish manataj tiyanchu.

⁴ Mana allita rurajcunaca imata mana entendijcunami. Ñuca agllashcacunataca tandata micuj shinallami millpuncuna. Taita Diostaca mana mañancunachu.

⁵ Manchana manapish tiyajpipish yallitaj jatun manchaihuanmi chujchurcacuna. Canta llaquichingapaj muyundijta shayacujcunapaj tullucunataca Taita Diosmi tsiraparca. Taita Dios shitajpimi paicunataca pingachircangui.

⁶ ¡Israelcunata quishpichijca Sionmanta llujshijpichari! Taita Dios pai agllashcacunataca prezupi cashcamanta tigrachimujpica, Jacobpaj huahuacunaca cushicungami. Israelcunaca cushicungami.