SALMOS 51 - Dios Rimashca Shimicunami

SALMO 51 Mana allita rurashcacunata perdonashpa chuyayachichun Taita Diosta mañashcami

Betsabé huarmihuan chayarinacushcamanta, profeta Natán shamushpa Davidta rimashca q'uipa tonota alli yachaj cantachichun David rurashca Salmomi.

¹ Taita Dios ñucata llaquihuayari. Quiquin llaquij cashca shinallataj llaquihuayari. Ima shina llaquij cashca shinallataj llaquishpa ñuca c'ariyashcacunata p'ichahuayari.

² ¡Millaita ñuca rurashcataca ashtahuan ashtahuan maillahuayari. Ñuca juchataca p'ichahuayari!

³ Quiquinta ñuca c'ariyashcacunataca rijsirinimi. Ñuca juchallishcaca ñuca ñaupajpi ricuricunllamari.

⁴ Quiquintaca p'iñachishcanimari. Juchallishpaca p'iñachishcanimari. Quiquinpaj ñaupajpica millaitamari rurashcani. Chaimanta rimashpaca rimana cajllapitajmi rimashcangui. Manapish rimana cajpica mana rimashcanguichu.

⁵ Ñucaca mamapaj huijsapi tiyarishca pachamantami millai cashcani. Ñuca mamaca juchayujtami chichushca.

⁶ Quiquinca mana llullatami yallitaj c'uyangui. Yachaj canataca pacallapimi yachachishcangui.

⁷ Hisopohuan chuyayachiyari. Ima mapa illajmi casha. Maillahuayari. Rasuta yalli ashtahuan yurajmi casha.

⁸ Ima llaqui illajlla, cushijlla canata uyachihuayari. Chaimi can llaquichishca ñuca tullucunaca cushicunga.

⁹ Ñuca juchacunata ama yuyarichu. Millaita rurashcacunataca tucuita p'ichahuayari.

¹⁰ ¡Taita Dioslla, ñucapica chuya shunguta callarichihuai. Ñuca ucupica ima pandata mana ruraj espirituta cutin churahuai!

¹¹ Quiquinpaj ñaupajmantaca, ñucataca ama anchuchihuaichu. Quiquinpaj jucha illaj Espiritutaca ñucamanta ama quichuichu.

¹² Quiquin quishpichijpi cushicuna cushicuita cutin cuhuayari. Tucuita rurai tucuj espirituhuan charirahuayari.

¹³ Chaimi mandashcata p'aquijcunamanca quiquinpaj ñanpi purinata yachachisha. Chaimi juchayujcunaca quiquinman cutiringacuna.

¹⁴ Taita Dioslla huañuchij canamanta huaquichihuai. Ñucata quishpichij Taita Dioslla. Quiquinpaj cashcata ruranataca ñuca c'alluca cantangami.

¹⁵ Jatun Dioslla, ñuca shimita pascahuai. Tucuicunapaj ñaupajpi quiquinta cantangapaj.

¹⁶ Animalcunata huañuchishpa quiquinman ñuca cuchunpish mana munanguichu. Cushpa tucui rupachichunpish mana munanguichu.

¹⁷ Taita Diosman animalta cushpa rupachina shinaca, shungu p'aquirishca paiman c'uchuyanami. Taita Dioslla, shungu llaquirishca, mana jatun tucushca quiquinpajman c'uchuyajpica mana yanganchinguichu.

¹⁸ Quiquinpaj yallitaj c'uyaihuan Sionpajca allita rurapayari. Jerusalén muyundij pircataca cutin shayachihuayari.

¹⁹ Quiquin munashca shina animalta cushpa chaipi rupachijpimi quiquin munashca canga. Quiquinman cushpa tucui rupachishcatapish chaipimi chasquingui. Sionpi caj quiquinpaj altarpimari bizicunataca quiquinman cushpa rupachishun.